(ඉන්දිකා රාමනායක)

විදේශ රටවල ලොතරැයි දිනුම් ඇදී ඇති බවට හා විදේශ රටකින්  වටිනා  ත්‍යාගයන්  ලැබී ඇති බවට  පවසමින්    අන්තර්ජාලය ඔස්සේ  පිරිස් මුලා කර රුපියල් කෝටි 6 ට අධික මුදලක් චංචා කළ බවට පැමිණිලි 101 ක්  අපරාධ පරීක්ෂණ දෙපාර්තමේන්තුවට ලැබී ඇති බව පොලිස් මාධ්‍ය හා තොරතුරු කොට්ඨාසය බාර නියෝජ්‍ය පොලිස්පති ලාල් සෙනවිරත්න මහතා අද (16)  පැවසීය.

මෙම පැමිණිලි අනුව  නයිජීරියානු ජාතිකයන් සහ චීන ජාතිකයන් 16 දෙනෙක්  පමණ  අත්අඩංගුවට  ගෙන ඇති බව  නියෝජ්‍ය පොලිස්පති ලාල් සෙනවිරත්න මහතා කියා සිටියේය.

මෙම වංචාවන් දිගින් දිගටම සිදුවන හෙයින් පිටරටින් ත්‍යාගයක් හෝ ලොතරැයි දිනුමක්  ඇදී ඇති බවට  පවසමින්  මුහුණු පොත හරහා  ,   විද්‍යුත් තැපෑල ඔස්සේ  යොමුකරන  පණිවිඩ   පිළිගෙන  නාදුනන  ගිණුම් වලට මුදල්  තැන්පත් කිරීමෙන් වළකින ලෙසට   මහජනයාගෙන් ඉල්ලා සිටින බව  නියෝජ්‍ය පොලිස්පතිවරයා කියා සිටියේය.

ලොතරැයි දිණුම් ඇදී ඇති බව පවසා  එම මුදල් ලබා දීමට බදු මුදල් වශයෙන් සහ පිටරටින් ත්‍යාග ඒවා රේගුවෙන් නිදහස් කිරීම සඳහා යැයි පවසමින්  විවිධ වංචාකරුවන් ඔවුන්ගේ  ගිණුම් වලට  වංචනික ලෙස මුදල් තැන්පත් කරගෙන ඇති බවට පැමිණිලි ලැබී ඇති බවද නියෝජ්‍ය පොලිස්පතිවරයා  කීය.

කිසිවකු නොමිලේ ත්‍යාග මුදල් ලබා නොදෙන බවත් , එවැනි වංචනිකයන්ට  රැවටී    නොදන්න ගිණුම් වලට මුදල් තැන්පත් කිරීමෙන් වළකින ලෙසත්  ජනතාවගෙන් ඉල්ලා සිටින බවද හෙතෙම සඳහන් කළේය.

ශ්‍රී ලංකාව වැනි රටවල  බොහොමයක්   පිරිස මෙවැනි  වංචාවන්ට  ඉතා ඉක්මනින් හසුවන බැවින්   නයිජීරියානුවන් ඇතුලු විදේශිකයන්  මෙවැනි ක්‍රියා සඳහා   ශ්‍රී ලංකිකයන් තෝරා ගන්නා බවද   නියෝජ්‍ය පොලිස්පතිවරයා වැඩිදුරටත් කියා සිටියේය.

නියෝජ්‍ය පොලිස්පති ලාල් සෙනවිරත්න මහතා මේ බව පැවසුමේ පොලිස් මූලස්ථානයේ අද පැවති මාධ්‍ය හමුවක දී ය.