(හර්ෂණ තුෂාර සිල්වා)

කිතුණු ප්‍රජාවෙන් ශ්‍රී ලංකාවේ ඉස්ලාමීය ජන ප්‍රජාවට කිසිදු හානියක් නොවන බවට තමන් සහතික වන බව මැල්කම් කාදිනල් රංජිත් කොළඹ අගරදගුරුතුමා අද (24) ප්‍රකාශ කළහ. 

ආගම් නාමයෙන් ප්‍රහාර එල්ල කරන , ප්‍රචණ්ඩ ක්‍රියා සිදු කරන සියලු දෙනා කිසිදු ආගමකට අයත් නැති බවත් ඔවුන් කිසිදු ආගමක ආගමිකයන් නොවන බවත් අගරදගුරුතුමා ්කීහ.

මෙවැනි ප්‍රහාර එල්ල කරන්නේ නොමඟ ගිය මානව දුර්වලතා ඇති කණ්ඩායම් බවත් අගරදගුරුතුමා පැවැසූහ.

ඉස්ලාමීය සහයෝගීතා සංවිධානය නියෝජන කරන රටවල මෙරට සිටින තානාපතිවරුන් හා මහ කොමසාරිස්වරුන් සහ ඉම්තියාස් බාකීර් පදනමේ සභාපති හිටපු අමාත්‍ය ඉම්තියාස් බාකීර් මාකර් මහතා ඇතුළු එම සංවිධානයේ පිරිසක් මැල්කම් කාදිනල් රංජිත් කොළඹ අගරදගුරුතුමා බැහැදුටු අවස්ථාවේදී අගරදගුරුතුමා එම කරුණු කීහ. 

අගරදගුරුතුමා එහිදි මෙසේ ද කීහ. 

“මෙවැනි ප්‍රහාර ආගමක් පදනම් කරගෙන සිදුවෙන ප්‍රහාර නෙමෙයි. කිසිදු ආගමිකයකුට, ආගමකට මෙවැනි ප්‍රහාරයක් මෙවැනි ව්‍යවසනයක් කරන්න බැහැ. මෙවැනි ප්‍රහාර එල්ල කරන්නේ ආගමක් නොමැති පිරිසක්. මේ ප්‍රහාරය එල්ල කර තිබෙන්නේ නොමඟ ගිය තරුණ කණ්ඩායමක්. එයා ඉතාමත් පැහැදිලිව පෙනෙන්නට තිබෙනවා. 

මෙවැනි ප්‍රහාර සිදුවන්නේ මානව දුර්වලතා. මිනිසුන් තුළ ඇතිවන විවිධ අඩුපාඩු නිසා. ඉස්ලාම් දහම ඉතා සාමකාමී ආගමක් බව අපි හොඳින් දන්නවා. අපි සැවොම දෙවියන් වහන්සේ විශ්වාස කරනවා. ඒ නිසා එකිනෙකාට ප්‍රහාර එල්ල කිරීම අප විසින් නොකළ යුතු දෙයක්.

 අපි සියලු දෙනා අත්වැල් බැඳගෙන කටයුතු කරපු අය. ඉස්ලාම් දහමත් කිතුණු දහමත් අතර සබඳතා තිබෙනවා. ඉස්ලාම් භක්තිකයන් සහ කිතුණු භක්තියන් අතර තිබෙන සබඳතාව ඉතාමත් ශක්තිමත්. වසර ගණනාවක් තිස්සේ අපි එකමුතුව ජීවත් වුණා. මේ රට ඉතාම සාමකාමී රටක්. කිතුණු ප්‍රජාවගෙන් ඉස්ලාම් ප්‍රජාවට කිසිදු හානියක් නැහැ.

මෙවැනි ප්‍රහාර එල්ල කරන අය ඉස්ලාම් දහම වෙනුවෙන් එසේ කළ බව කීවත් ඒ කිසිවක් ඉස්ලාම් දහමට අනුකූල නැහැ. අපේ ඉස්ලාමීය සහෝදරයන්ට එරෙහිව අත් ඔසවන්න එපා යැයි අපේ කිතුණු ප්‍රජාවගෙන් ඉල්ලා සිටියා. 

මේ හමුවට පෙර සර්ව ආගමික නායකයන් මුණ ගැසුණා. මුස්ලිම් ඇමැතිවරුන්, මන්ත්‍රීවරුන් මා මුණ ගැසුණා. මවුලවිවරුන් ද පැමිණ මා සමඟ කතා කළා. ඔවුන් සියලු දෙනාටම මම සහතික කර කිව්වා, කිතුණු ප්‍රජාවගෙන් ඉස්ලාම් ප්‍රජාවට කිසිදු හානියක් වෙන්නේ නැහැ. විදියට තමයි මොවුන් ක්‍රියාත්මක වී තිබෙන්නේ කාටහරි වුවමනා පරිදි. 

මම අවමංගල්‍ය උත්සව රැසකට සහභාගී වුණා. අපේ පියවරු රැසක් ඒවාට ගියා. ඉස්ලාම් භක්තිකයන්ට පීඩා නොකරන්නැයි අපේ ප්‍රජාවගෙන් ඉල්ලන්නැයි මා ඔවුන්ට උපදෙස් දුන්නා. ඉස්ලාම් ප්‍රජාවට එරෙහිව අප අත් ඔසවන්නේ නැහැ. අපට එරෙහිව මේ ප්‍රහාර එල්ල කළ පිරිස වෙනුවෙන් ද අප යාඥා කරනවා. එසේ කළා. මා නැවත නැවතත් කියනවා. ඔවුන් නොමඟ කණ්ඩායමක් පමණයි. 

ලංකාවේ කිතුණු ප්‍රජාවත් ඉස්ලාම් ප්‍රජාවත් කාලයක් තිස්සේ ඉතා සමගියෙන් සහයෝගයෙන් ජීවත් වුණා. මේ ප්‍රහාර එල්ල කළේ මුස්ලිම්, කතෝලික, හින්දු හෝ බෞද්ධ යන ආගම්වලට සම්බන්ධ අය නෙමෙයි. මේ ප්‍රහාර එල්ල කළේ නොමඟ ගිය තරුණ කණ්ඩායමක්. 

මෙය කළේ කවුරුන්ද කියලා අපි තවමත් දන්නේ නැහැ. මෙය පිටුපස ඉන්නේ කවුද කියලා අපි දන්නේ නැහැ. මේ ප්‍රහාර එල්ල කළ පිරිසට ආගම් ගැන දැනුමක් හැඟීමක් නැහැ. ඔවුන්ට ආගමක් නැහැ. ආගමික පුද්ගලයකු මෙවැනි ප්‍රහාරයක් එල්ල කරන්න බැහැ. 

මෙවැනි ත්‍රස්තවාදී කණ්ඩායම් නිර්මාණය වන්නේ අපේම වැරැදි අඩුපාඩුවලින් බව කියන්න ඕනේ. සමාජයේ විවිධ අසාධාරණකම් අයුක්ති සහගත දේවල් තිබෙන බවත් පිළිගන්න ඕනේ. ඒවායේ ගොදුරු බවට පත්වන්නේ තරුණ කණ්ඩායම්. එවැනි අසාධාරණකම් නිසා තරුණ කණ්ඩායම් බලාලෝභී පිරිස්වල ගොදුරු බවට පත්වෙනවා.

මැද පෙරදිග ප්‍රශ්න දිහා බලන්න. ස්ථාවරව සාමකාමීව තිබූ රටවල සාමය නැතිවෙලා. අද වෙද්දි ඒ රටවල් අස්ථාර වෙලා. එක රටක යුද්ධයක් ඉවර වෙද්දි තවත් රටක යුද්ධයක්. ඇතැම් කණ්ඩායම් ඒවාට ආගම් පදනම් කරගන්නවා. එහෙත් ඒවා පිටුපස තිබෙන්නේ ආගම් නෙමෙයි. ඒවාට පදනම් වෙන්නේ ආගම් නෙමෙයි. ඒවා පිටුපස බලවත් කණ්ඩායම් සිටිනවා. ත්‍රස්තවාදී කණ්ඩායම් අපට පෙන්වන මුහුණුවර නෙමෙයි පිටුපස තිබෙන්නේ. ඒවා පිටුපස ඉන්නේ කවුද කියන්න අපි දන්නේ නැහැ. ඇතැම් බලලෝභී වුවමනා ආගමික මුවාවෙන් පැමිණෙනවා. මැදපෙරදිග අස්ථාවර වෙලා. මේවා පිටුපස ඉන්නේ කවුදැයි ඔබ දන්නවා.”