(හිරාන් ප්‍රියංකර ජයසිංහ)
අරුවක්කාඩු කසල අංගනයට කසල ප්‍රවාහනය කරමින් තිබූ ටිපර් රථ සඳහා ආරක්ෂාව ලබාදෙමින් ගමන් කළ පොලිස්  කැබ් රථයකට අද (24) ගල් ප්‍රහාරයක් එල්ල වී ඇති බව පුත්තලම මුලස්ථාන පොලිසිය පවසයි.

මෙසේ ගල් ප්‍රහාරය එල්ල වී ඇත්තේ පුත්තලම මූලස්ථාන පොලිසියේ එල්.ඩි.6907 අංක දරණ මුර සංචාරක කැබ් රථයට බව කියයි.

කොළඹ සිට අරුවක්කාඩුවට කසල ප්‍රවාහන කරමින් තිබු ටිපර් රථ සදහා ආරක්ෂාව ලබා දෙමින් ගමන් කරමින් තිබු මෙම පොලිස් කැබ් රථයට ප්‍රහාරය එල්ල වි ඇත්තේ පුත්තලම තිල් අඩිය ප්‍රදේශයේදී බව කියයි.

තිල් අඩිය ප්‍රදේශයේ සැඟවී සිටි පිරිසක් කසල රැගෙන යමින් සිටි ටිපර් රථවලට ගල් ප්‍රහාරයක් එල්ල කරමින් සිටියදී මෙම පොලිස් ජීප් රියටද එකවර ප්‍රහාරය එල්ල වූ බව කියයි.

එසේම මෙම ගල්ප්‍රහාර වලින් කසල ප්‍රවාහන කරමින් තිබූ ලොරි රථයකටද ගල් ප්‍රහාරයක් එල්ල වී තිබු අතර එහි ඉදිරියේ ප්‍රධාන වීදුරුවට හානි සිදුව ඇති බව පොලිසිය පවසයි.

සිද්ධිය සම්බන්ධව ගල් ප්‍රහාරය සිදුවූ අවස්ථාවේදිම සැකකරුවකු අත්අඩංගුවට ගැනීමට පොලිස් නිලධාරීහු සමත්වූහ.

අත්අඩංගුවට ගත් සැකකරු වාහනවලට පහර දීමට සඟවාගෙන තිබූ ගල් කීපයක්ද පොලිසිය ඒ සමගම අත්අඩංගුවට ගෙන ඇති බව කියයි. මෙම කසල ප්‍රවාහන ටිපර් රථ වෙනුවෙන් ස්ථාන ගණනාවක යුද හමුදාවද ආර්ක්ෂාවට යොදවා ඇති බවද කියයි.

අත් අඩංගුවට ගත් සැකකරු පුත්තලම අධිකරණයට ඉදිරිපත් කිරීමට නියමිතව ඇත.