අඩු පහසුකම් සහිත ප්‍රදේශවල ඩිජිටල් සම්බන්ධතා දියුණු කරන්න නියෝග
(ඩිල්ෂානි චතුරිකා දාබරේ)
ශ්‍රී ලංකාවේ අඩු පහසුකම් සහිත ප්‍රදේශවල ඩිජිටල් සේවා සම්බන්ධතා වඩාත් ඉහළ මට්ටමකට ගෙන එන ලෙස, ශ්‍රී ලංකා විදුලි සංදේශ නියාමන කොමිෂන් සභාවේ අධ්‍යක්ෂ ජනරාල් ඕෂධ සේනානායක මහතා දුරකතන සේවා සපයන සමාගම්වලට අද(02) උපදෙස් දී තිබේ. භූගෝලීය බාධක නොතකා දිවයින පුරා ඩිජිටල් සේවා වෙනුවෙන් ප්‍රවේශවීම සහතික කිරීම සඳහාත්, 100% ක් (4G) බ්‍රෝඩ්බෑන්ඩ් ආවරණය ශ්‍රී ලංකාව පුරා ස්ථිර කිරීම සඳහාත් වහාම පියවර ගන්නා ලෙසද ඒ මහතා දැනුම් දී තිබේ.
විදුලි සංදේශ නියාමන කොමිෂන් සභාව ආරම්භ කළ “ගමට සන්නිවේදනය” නම් වන මෙම ව්‍යාපෘතිය සම්බන්ධයෙන් එම කොමිෂන් සභාවේ ශ්‍රවනාගාරයේ දී අද පැවති රැස්වීමේදී ඒ මහතා මේ බව පවසා තිබේ.
සියලු දිස්ත්‍රික්ක ආවරණය වන පරිදි කරන ලද බිම් මට්ටමේ සමීක්ෂණයක් මගින් ශ්‍රී ලංකා විදුලි සංදේශ නියාමන කොමිසම විසින් අඩු පහසුකම් සහිත බවට හඳුනාගෙන ඇති ප්‍රදේශ සඳහා මෙහිදී වැඩි අවධානයක් යොමුකෙරේ.
මෙහි නියාමක ව්‍යාපෘතිය රත්නපුර දිස්ත්‍රික්කයේ ආරම්භ කරන බවද සේනානායක මහතා පැවසීය. විදුලි සංදේශ බදු අරමුදල් වලින් ඒ සඳහා ශ්‍රී ලංකා විදුලි සංදේශ නියාමන කොමිෂන් සභාව ද ආයෝජනය කරයි.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
