අඹගහෙන් ඇදවැටී හොරගමන මාට්ටු
(මොරගොල්ලාගම - සිසිර කැලේගම)
අඹ ගසකට ගොඩ වී වහලයට මාරු වී අන් සතු නිවසකට මැදියම් රාත්‍රියේදී ඇතුළුවීමට තැත් කළ තැනැත්තෙකු අඹ ගසෙන් ඇද වැටී තුවාල ලබා රෝහල් ගතකිරීමේ පුවතක් පොල්පිතිගම පොලිසියෙන් වාර්තා විය.
පොලිසිය පවසන ආකාරයට සිද්ධිය මෙසේය.
නිවස අසල ඇති අඹ ගසක ආධාරයෙන් වහලයට මාරු වීමට මෙකී තැනැත්තා ඉකුත් 15 වෙනි දින මැදියම් රාත්‍රියේදී තැත් කළ අවස්ථාවේදී එකී නිවසේ බල්ලන් බුරන ශබ්දයට නිවැසියන් විදුලි පහන් දල්වා දොරවල් විවෘත කර එළියට පැමිණ ඇත. ඒ අවස්ථාවේදී වහලය මත සිටි මෙම තැනැත්තා කලබලයට පත්ව අඹ ගසේ අත්තක ආධාරයෙන් යළි බැස පලා යෑමට තැත් කිරීමේදී අඹ අත්ත කඩාගෙන බිමට ඇද වැටී තිබේ.
ඒ සමඟම නිවැසියන් ඒ බව පොලිස් හදිසි ඇමතුම් (119) අංශයට දුන් තොරතුරු මත පොල්පිතිගම නියදවනය ප්‍රදේශයේ පිහිටි එම නිවසේ මිදුලේ වැටී සිටි තැනැත්තා අත්අඩංගුවට ගෙන ඒ මොහොතේම පොල්පිතිගම දිසා රෝහලට ඇතුළත් කළ බව පොලිසිය සඳහන් කළේය.
ගසෙන් බිමට ඇද වැටීමෙන් ඔහුගේ පාදයට තුවාල සිදුවී ඇති බැවින් වැඩිදුර ප්‍රතිකාර සඳහා කුරුණෑගල ශික්ෂණ රෝහලට මාරු කර යවා ඇති අතර ඔහුගේ තත්ත්වය බරපතළ නොබන බව රෝහල් සේවකයෙක් ප්‍රකාශ කළේය. වහලයට මාරු වී නිවසට ඇතුළුවීමට මෙම තැනැත්තා තැත් කළ අස්ථාවේදී මෙකී අනතුරට පත්ව ඇති බවට තොරතුරු අනාවරණය වෙන බැවින් ඒ ඔස්සේ වැඩිදුර පරීක්ෂණ අරඹා ඇතැයි පොල්පිතිගම පොලිසිය පැවසීය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
