(ඩයනා උදයංගනී)
සුළු හා මධ්‍ය පරිමාණ ව්‍යවසායකයින් වෙනුවෙන් තවත් බදු සහන ලබාදීමට රජය තීරණය කර ඇතැයි සම කැබිනට් ප්‍රකාශක, වැවිලි කර්මාන්ත හා අපනයන කෘෂිකර්ම අමාත්‍ය, වෛද්‍ය රමේෂ් පතිරණ මහතා  පැවසීය.

ජනාධිපති ගෝඨාභය රාජපක්‍ෂ මහතා බලයට පත්වීමෙන් පසු සුළු හා මධ්‍ය පරිමාණ ව්‍යවසායකයින් ඇතුළු පාර්ශව සඳහා ඉකුත් නොවැම්බරයේ සිට සරල හා විනිවිදභාවයකින් යුත් බදු ක්‍රමයක් හඳුන්වා දෙනු ලැබූවත් කොවිඞ් 19 වසංගතයේ බලපෑම හමුවේ සුළු හා මධ්‍ය පරිමාණ ව්‍යවසායකයින්ට නැවතත් ව්‍යාපාර ආරම්භ කිරීම සඳහා ඔවුන්ගේ බදුබර සැහැල්ලු කිරීම මෙහි අරමුණ බව ද අමාත්‍යවරයා සඳහන් කළේය.

 ඔවුන් බදු සම්බන්ධ දඩ මුදල්වලින් නිදහස් කිරීමටත්, එම දඩ මුදල් නැවත අයකිරීම ජූලි මාසයේ සිට ආරම්භ කිරීමටත් රජය පසුගියදා තීරණය කළ අතර ඔවුන්ට තවත් බදු සහනදීම සඳහා අග්‍රාමාත්‍ය මහින්ද රාජපක්‍ෂ මහතා ඉදිරිපත් කළ යෝජනාවකට  කැබිනට් රැස්වීමේදී අනුමැතිය හිමිවු බව රමේෂ් පතිරණ මහතා කීවේය.

අමාත්‍යවරයා මේ බව පැවසුවේ අමාත්‍ය මණ්ඩල තීරණ දැනුම්දීම සඳහා රජයේ ප්‍රවෘත්ති දෙපාර්තමේන්තුවේදී අද(25) පැවති මාධ්‍ය හමුව අමතමිනි.

ඒ අනුව චේතනාන්විතව බදු ගෙවීම පැහැරහැරීමක් කර නොමැති බවට දේශීය ආදායම් කොමසාරිස් ජනරාල්වරයා සෑහීමට පත්වන්නේ නම් 2018/2019 තක්සේරු වර්ෂය දක්වා තක්සේරු මත ගෙවිය යුතු හිඟ ආදායම් බදුවලින් නිදහස් කිරීම, 2019/20 තක්සේරු වර්ෂය සඳහා බදු ගෙවා ඇති ව්‍යවසායකයින්ට නැවත අතිරේක තක්සේරු නිකුත් නොකිරීම, බදු අභියාචනා කොමිෂන් සභාවට අභියාචනයක් ඉදිරිපත් කිරීමේදී බැංකු ඇපකරය හෝ ආපසු නොගෙවන මුදල ගෙවීමට ලබාදෙන කාලය දීර්ඝ කිරීම, හිඟ සහ පැහැර හැර ඇති බදු ගෙවීම සඳහා සහන කාලයක් ලබාදීම, බැංකු වෙත නිකුත් කර ඇති තහනම් නියෝග ක්‍රියාත්මක කිරීම 2021 අප්‍රේල් 30 තෙක් අත්හිටුවීම, ඉකුත් මාර්තු 1 වැනිදා සිට ලබන ජූනි 30 වැනිදා දක්වා කාලයට අදාළ බදු ගෙවීම් හා බදු වාර්තා ලබාදීමට ලබන දෙසැම්බර් 31 වැනිදාට පෙර සිදුකිරීමට අවසරදීම ආදී සහන ඔවුන්ට හිමිවන බව අමාත්‍යවරයා ප්‍රකාශ කළේය.