(තිළිණි ද සිල්වා)


එක්සත් ජාතීන්ගේ ලෝක සංචාරක සංවිධානයේ නැගෙනහිර ආසියාව, පැසිෆික් කලාපය  සහ දකුණු ආසියාව සඳහා වන කොමිෂන් සභාවේ 32 වන ඒකාබද්ධ රැස්වීම ලබන ජුනි මස අග කොළඹ දී පැවැත්වෙන බව ශ්‍රී ලංකා සංචාරක සංවර්ධන අධිකාරිය පවසයි.

ඒ අනුව එම රැස්වීම ජුනි 29 සිට ජූලි 1 දක්වා කොළඹදී පැවැත්වීමට නියමිත අතර ශ්‍රී ලංකා සංචාරක සංවර්ධන අධිකාරිය මේ වන විට සමුළුව සංවිධානය කිරීමේ කටයුතු කරමින් සිටී. 

මෙවර සමුළුවේ තේමාව වන්නේ සමකාලීන අභියෝග සහ සංචාරක පුනර්ජීවනයයි. එහි අරමුණ වන්නේ අර්බුදකාරී කාලයන්ට ප්‍රතිචාර වශයෙන් සංචාරක කර්මාන්තය පුනර්ජීවනය කරන්නේ කෙසේද යන්න සහ සංචාරක අංශයට සහ එහි කර්මාන්ත සඳහා ඵලදායී අර්බුද කළමනාකරණ මෙවලම් සහ උදාහරණ පිළිබඳ දැනුම හුවමාරු කර ගෑනීමයි. 

මෙම සමුළුවට සාමාජික රටවල් නියෝජනය කරන විදේශීය නියෝජිතයින් 150 කට ආසන්න සංඛ්‍යාවක් සහභාගී වීමට නියමිත අතර ආරාධිතයින් අතර සාමාජික රටවල සංචාරක අමාත්‍යවරුන්, රජයේ ඉහළ නිලධාරීන් සහ ගෝලීය සංචාරක කර්මාන්තයේ නියෝජිතයින් ඇතුළත් වන බවද එම අධිකාරිය කියා සිටී.

පසුගිය වසරේ භූතානයේ තිම්පු හි පැවති 31 වන ඒකාබද්ධ රැස්වීමේ දී, 32 වන ඒකාබද්ධ රැස්වීම පැවැත්වීමට පාස්කු ඉරිදා ප්‍රහාරයෙන් පසුව ශ්‍රී ලංකාව ඉල්ලා සිටි අතර ලෝක සංචාරක සංවිධානයේ මහලේකම් සූරාබ් පොලොලිකෂ්විලිගේ සහාය ඇතිව 32 වන ඒකාබද්ධ රැස්වීම ශ්‍රී ලංකාවේ පැවැත්වීමට සාමාජික රටවල් ඒකමතිකව එකඟ විය. 

“මෙම සමුළුවේදී රජයේ ඉහළ පෙළේ නියෝජිතයින් පිළිගැනීමටත් අපගේ නිෂ්පාදන හා සේවාවන් ප්‍රදර්ශනය කිරීමටත් අපි බලාපොරොත්තු වෙමු” යනුවෙන් ශ්‍රී ලංකා සංචාරක සභාපති කිමාර්ලි ප්‍රනාන්දු පැවසුවාය.