(රොමේෂ් මධුෂංඛ)

මුලතිව් නයාරු ගුරුකන්ද රජමහා විහාරස්ථා‍නයේ භාරකරුට පහරදෙන බවට තර්ජනය කරමින් දෙමළ දේශපාලකයන් ඇතුළු පිරිසක් විහාර භූමියේ ඇති කෝවිල වෙත පැමිණ අද (11) පූජාවක් සිදුකළ බව විහාරයේ දායක සභාව පවසයි.

උතුරු පළාත් සභා දෙමළ ජාතික සන්ධාන හිටපු මන්ත්‍රී ටි.රවිහරන් මහතා ඇතුළු පිරිසක් විහාරයේ වර්තමානයේ සිටින භාරකාර තරුණයා වෙත පහරදීමට තැත් කරමින් තර්ජනය කර කෝවිලේ පූජාවක් කිරීමට උත්සහ කර ඇත.

සිද්ධිය සම්බන්ධයෙන් විහාරයේ තාවකාලික භාරකාර කැලුම් බංඩාර තරුණයා පවසා සිටියේ වර්තමාන විහාරාධිපති නාහිමියන් පන්සලේ නොසිටි බවත් තමන්ට තාවකාලිකව විහාරය බලා ගැනීමට පවරා ගිය අවස්ථාවේදී මෙම සිදුවීම සිදුවූ බවයි.

අද (11) රවිහරන් මන්ත්‍රීවරයා ඇතුළු පිරිසක් විහාරය වෙත ට්‍රැක්ටර රථ වලින් පැමිණ මඩුවක් ගසා විහාරයේ ඇති කෝවිලේ පූජාවක් කරමින් සිටින අවස්ථාවේ කෝවිලේ පිරිසක් පැමිණ තමන්ට පහරදෙන බවට තර්ජනය කළ බවත් ඒ අතර රවිහරන් මන්ත්‍රීවරයා ඇතුළු පිරිසක්ද එහි සිටි බවත් එහිදී තමන් සමඟ උණුසුම් වචන හුවමාරුවක් සිදු වූ බවත් එම තරුණයා පැවසීය.

එම අවස්ථාවේදී විහාරස්ථානයේ ආරක්ෂාවට පොලිසිය යොදා සිටි බවත් එම තරුණයා වැඩි දුරටත් පැවසීය.