උඩු ගුවන් වැසිකිළියක් රුපියල් ලක්ෂ 24890

පොළවේ සිට සැතපුම් 265 ක් ඉහළ අභ්‍යාවකාශයේ පිහිටි අන්තර්ජාතික අභ්‍යාවකාශ මධ්‍යස්ථානයේ සිටිනා ගගනගාමීහු වැසිකිළි යන්නේ කෙසේදැයි ඔබට ගැටලූවක් ඇත්නම් එයට පිළිතුරු ඇමරිකා විද්‍යාඥ හෑන්ක් ග්‍රීන් දැන් ලබා දී ඇත.

අභ්‍යාවකාශයේ ඇති වස්තු සියල්ලටම පෘථීවිය මත තිබුණු තත්ත්වයන් තවදුරටත් බලනොපායි. මෙය අන්තර්ජාතික අභ්‍යාවකාශ මධ්‍යස්ථානයටත් පොදුය.

ලොකුම වෙනස වන්නේ ගුරුත්වයක් නොමැති වීමය.

මෙනිසා අන්තර්ජාතික අභ්‍යාවකාශ මධ්‍යස්ථානයේ වෙසෙන්නන්ට පෘථීවියේ පුරුද්දට ආහාර ගැනීම, ඇවිදීම, නිදා ගැනීම කළ නොහැක.මෙම කටයුතු වලට වැසිකිළි යෑමද ඇතුළත්ය.

වැසිකිළි යෑම ගැන වැඩිදෙනා කතා නොකළද එය කිසිසේත් නොසළකා හැරිය නොහැකි කටයුත්තක් බව විද්‍යාඥ හෑන්ක් ග්‍රීන් පෙන්වා දේ.

මෙනිසා විද්‍යාඥයින්ට අලූතින්ම සිතීමට සිදුවූ බව ඔහු කියයි.

එහි ප්‍රතිඵලයක් ලෙස මලපහ කිරීම සදහා එක් වැසිකිළියකුත් මුත්‍රා පහ කිරීම සදහා වැසිකිළියක් නොව උපකරණයකුත් නිපදවී ඇත.

මලපහ කිරීම සදහා යොදාගැනෙන වැසිකිළි පෝච්චියේ මුවවිටෙහි විශ්කම්භය අඟල් 4 ක් පමණය.අප ගෙදර දොර ඇති වැසිකිළි පෝච්චි වල ප්‍රමාණය සැළකූ විට මෙය කෙතරම් කුඩා දැයි සිතාගත හැකිය.

මෙවන් කුඩා විවරයක් ඇති පෝච්චියක් පැවැතීමට හේතුව පැහැදිලි කරනා විද්‍යාඥ ග්‍රීන් පවසන්නේ මුවවිට විශාල වැසිකිළි පෝච්චියක් තිබුණහොත් මධ්‍යස්ථානයේ පවති ශුන්‍ය ගුරුත්වය නිසා අපද්‍රව්‍ය පිටතට යෑමේ ඉඩක් පවතින බවයි.

පෝච්චිය උඩ හිඳ ගැනීමද ලෙහෙසි නැත. කැමරාවක් ආධාරයෙන් පශ්චාත් භාගය වැසිකිළි පෝච්චියට උඩින් ‘‘ස්ථානගත‘‘ කර ගැනීමට මුලින්ම එහි හිඳගන්නාට සිදුවේ. ශරීර කෘත්‍යය කර ගත හැක්කේ ඉන් පසුවය.

මෙම පෝච්චි වල ජලය නොමැති අතර ඇත්තේ එයට සවිකළ වූෂක යන්ත්‍රයකි. ශරීර කෘත්‍යයේ යෙදී අවසාන වූ පසු කරන්නට ඇත්තේ චූෂක යන්ත්‍රය ක්‍රියාත්මක කිරීම වන අතර මල අපද්‍රව්‍ය ඇදගන්නා එම යන්ත්‍රය ඒවා අභ්‍යාවකාශ මධ්‍යස්ථානයෙන් පිටත ඇති ටැංකියක තැන්පත් කරවයි.

මුත්‍රා පහ කිරීමේ කටයුත්ත මීට වඩා වෙනස්ය. ඒ සදහා පුනීලයක් යොදාගැනෙන අතර එහිද ඇත්තේ චූෂක උපකරණයකි. ඇදගන්නා මුත්‍රා පෙර අවස්ථාවේ සේම පිටත ඇති ටැංකියක ගබඩා කෙරේ.

මෙම වැසිකිළි හා කැසිකිළි වල මිල ගණන්ද එසේ මෙසේ ඒවා නොවේ. එක් වැසිකිළි පෝච්චියක් ඩොලර් ලක්ෂ 190 (රුපියල් ලක්ෂ 24890) සිට ඉහළට මිල කර තිබෙන අතර අභ්‍යාවකාශ මධ්‍යස්ථානයේ ඇති මුලූ වැසිකිළි හා කැසිකිළි පද්දතියේම වටිනාකම ඩොලර් ලක්ෂ 2500 (රුපියල් ලක්ෂ 327500) ක් පමණ වේ.

මුත්‍රා පිරිසිදු කර ජලය නිපදවාගැනීමේ පද්දතියක්ද මධ්‍යස්ථානයේ තිබෙන අතර එම ජලය පානය කිරීමට හා ස්නානය කිරීමට යොදාගැනේ.

ඉදිරියේදී මුත්‍රා යොදාගෙන විද්‍යුතය නිපදවා ගැනීමේ ක්‍රමයක්ද හදුන්වාදීමට නාසා ආයතනය සැළැසුම් කර ඇත.

මලපහ වලට නම් කුමක් කළ යුතුව ඇත්දැයි තවමත් කිසිවෙකුටත් අදහසක් නොමැත.