කොංගෝ රාජ්‍යයේ සරම්ප වසංගතයක් හේතුවෙන් මියගිය සංඛ්‍යාව 6000 ඉක්මවා ඇතැයි ලෝක සෞඛ්‍ය සංවිධානය පවසයි.

මෙය ලෝකයේ විශාලතම සහ වේගවත්ව පැතිරෙන වසංගතය ලෙස හඳුනාගෙන ඇති බවද එම සංවිධානය වැඩිදුරටත් පවසයි.

පසුගිය වසරේ කොංගෝ රටෙන් සරම්ප රෝගීන් 310000ක් පමණ වාර්තා වී ඇත.

රටේ පළාත් 26න්ම සරම්ප රෝගීන් වාර්තා වී ඇති අතර පසුගිය ජුනි මාසයේ සිට රෝගීන් වාර්තා වීම වැඩි වන්නට විය.

රෝගය මර්දනය කිරීම සඳහා කොංගෝ රජය හා ලෝක සෞඛ්‍ය සංවිධානය එක්ව පසුගිය සැප්තැම්බර් මාසයේ සිට හදිසි එන්නත් කිරීමේ වැඩසටහනක් ක්‍රියාත්මක කර ඇත.

ලෝක සෞඛ්‍ය සංවිධානය පවසන්නේ 2019 වසරේදී රට පුරා ළමුන් මිලියන 18කට වැඩි ප්‍රමාණයකට එන්නත් ලබාදුන් බවයි.

එහෙත් යටිතල පහසුකම් දුර්වල වීම, සෞඛ්‍ය මධ්‍යස්ථානවලට පහර දීම සහ සාමාන්‍ය සෞඛ්‍ය සේවා පවත්වාගෙන යෑමට නොහැකි වීම යන හේතු නිසා රෝගය පැතිරීම වැළැක්වීමට දරන ප්‍රයත්න අඩාල වී තිබේ.

කොංගෝ රාජ්‍යයේ ඉබෝලා වසංගතය ද දරුණු ලෙස පැතිරෙමින් ඇත.

(බීබීසී ඇසුරිණි - 085)