ජපානයට බලපා ඇති අධික වර්ෂාව සහිත කාලගුණ තත්ත්වයෙන් පුද්ගලයින් තිදෙනෙක් මියගොස් ලක්ෂ 9 කට අධික පිරිසක් අවතැන් වී ඇති බව විදෙස් මාධ්‍ය පවසයි.

ජපානයේ දකුණු දිග ක්යුෂු දිවයිනට පැය 48 ක් පුරා අධික වර්ෂාපතනයක් බලපා ඇත.

එමෙන්ම සාගා ප්‍රදේශයට පැය 48 ක කාලයක් තුළ මිලිමීටර් 427 ක වැසි ඇදහැලුණු අතර ගංවතුර සහ නායයාම් ඇතිවිය හැකි බවට අනතුරු අඟවා ඇත.

ජල ගැල්ම හේතුවෙන් කර්මාන්ත ශාලාවල තෙල් ජලයට මුසුවී ඇති අතර ඒවා වගා බිම් කරාද පැතිර ගොස් තිබේ.

පුද්ගලයින් හය ලක්ෂ හැත්තෑදහසකට ඔවුන් පදිංචි ස්ථානවලින් ඉවත් වන ලෙසට දැනුම් දී ඇති අතර අවතැන්වූවන් වෙනුවෙන් සහන සේවා රැසක් ක්‍රියාත්මක කර ඇත.

රථ වාහන 450 ක් පමණ ගංවතුරෙන් යටවී ඇති බව ද බලධාරීහු පවසති.

(රොයිටර් ඇසුරෙනි)

-226-