පසුගිය මාස තුන ඇතුළත යේමනයේ කොලරා රෝගීන් 1900ක් පමණ මියගොස් ඇතැයි ලෝක සෞඛ්‍ය සංවිධානය පවසයි.

කොලරා රෝගීන් ලක්ෂ හතරකට වැඩි ප්‍රමාණයක් එම මාස තුන ඇතුළත හමුවී ඇති අතර  ඉන් වැඩි පිරිසක් කුඩා දරුවන් බව  එම සංවිධානය පවසයි.

මියගිය පිරිසගෙන් 32%ක්ම අවුරුදු 15ට අඩු දරුවන් බවට වාර්තා වී ඇත. ලෝක සෞඛ්‍ය සංවිධානය පෙන්වා දෙන්නේ දරුවන් පෙලෙන උග්‍ර මන්දපෝෂණ තත්ත්වය හේතුවෙන් කොලරා රෝගය පැතිරීම වේගවත් වී ඇති බවයි. 2015 වර්ෂයේ සිට යේමනයේ පවතින සිවිල් යුද්ධය නිසා රෝග මර්ධන කටයුතු අඩාල වී ඇති බවද ඔවුහු පෙන්වා දෙති.

දරුවන් සම්බන්ධව කටයුතු කරන 'සේව් ද චිල්ඩ්රන්' ආයතනය පවසන්නේ යේමනයේ මන්දපෝෂණයෙන් පෙළෙන දරුවන් මිලියනයක් පමණ කොලරා රෝගය විශාල වශයෙන් පැතිරී ඇති ප්‍රදේශ වල සිටින බවයි.

මන්දපෝෂණය සහිත දරුවන්ගේ ප්‍රතිශක්තීකරණ පද්ධතිය දුර්වල වීම නිසා ඔවුන්ට ඉක්මනින් රෝගය වැළඳෙන බවත් එවැනි දරුවකු මියයෑමේ සම්භාවිතාවය තුන් ගුණයකින් වැඩි බවත් මෙම සංවිධානය පෙන්වා දෙයි.

(සීඑන්එන් පුවත් ඇසුරිණි - 085)