මාලදිවයිනේ ජනාධිපතිවරණය ලබන නොවැම්බර් 9 වැනි දා පැවැත්වීමට තීරණය කළ බව, එරට මැතිවරණ කොමිසම නිවේදනය කර ඇත.

ජනපතිවරණයේ දෙවැනි වටයක් අවශ්‍ය වුවහොත්, එය නොවැම්බර් 16 වැනිදා පැවැත්වෙනු ඇති බව ද මැතිවරණ කොමිසම වැඩිදුරටත් කියා සිටියේය.
මාලදිවයිනේ ජනපතිවරණය පැවැත්වීමට නියමිතව තිබුණේ පසුගිය 19 වැනිදාය. එහෙත්, පොලිසියෙන් සිදුවුණු බාධා කිරීම් මැද එය අවලංගු කිරීමට මැතිවරණ කොමිසමට සිදුවිය.

පොලිසිය කියා සිටියේ ශ්‍රේෂ්ඨාධිකරණය ලබා දුන් තීන්දුවකට අනුකූල නොවන ආකාරයට මැතිවරණය පැවැත්වීමට උත්සාහ කළ නිසා එය වැළැක්වීමට තමන් පියවර ගත් බවය. මාලදිවයින් ජනපතිවරණය අවලංගු කෙරුණු දෙවැනි අවස්ථාව මෙය විය.

පොලිසිය කළ කි‍්‍රයාව, රටේ ව්‍යවස්ථාදායකයේ අර්බුදයක් නිර්මාණය කිරීමට, හේතුවක් වනු ඇතැයි එරට දේශපාලන විචාරකයෝ බිය පළ කළහ.
ජනාධිපතිවරණය අවලංගු කිරීමට මැතිවරණ කොමිසම පියවර ුගත් අවස්ථාවේ එරට විපක්ෂ දේශපාලන කණ්ඩායම වන හිටපු ජනපති මොහොමඞ් නෂීඞ්ගේ ‘ප‍්‍රජාතන්ත‍්‍රවාදී පක්ෂ’ කි‍්‍රයාකාරීහු මාලේ අගනුවර සාමකාමී විරෝධතා රැලියක් ද පැවැත්වූහ.

විරෝධතාකරුවන් වත්මන් මාලදිවයින් ජනපති වහීඞ් හසන් ඇතුළු රජයෙන් ඉල්ලීමක් කළේ කිසිදු බාධාවකින් තොරව, ජනපතිවරණය කඩිනමින් පැවැත්වීමට මැදිහත් වී කටයුතු කරන ලෙසටය.

එපමණක් නොව, ඇමෙරිකාව, බි‍්‍රතාන්‍යය මෙන්ම එක්සත් ජාතීන්ගේ මහ ලේකම් බෑන් කී මූන් ද මාලදිවයින් ජනපති වහීඞ් හස්න්ගෙන් ඉල්ලා සිටියේ, කඩිනමින් මැතිවරණය පැවැත්වීමට කටයුතු කරන ලෙසටත්, රටේ ප‍්‍රජාතන්ත‍්‍රවාදය ස්ථාපිත කරන ලෙසටත්ය.

මාලදිවයිනේ ප‍්‍රජාතන්ත‍්‍රවාදය තහවුරු කිරීමේ වැදගත් සංධිස්ථානයක් වූ එම ජනපතිවරණයට පොලිසිය බාධා කිරීම කිසිසේත් අනුමත කළ නොහැකි යැයි, ඇමෙරිකාව සහ බි‍්‍රතාන්‍යය පවසා තිබුණි.

මාලදිවයිනේ මීට පෙර, ඉකුත් සැප්තැම්බර් 7 වැනිදා ජනපතිවරණයක් පැවැත්විණි. එහිදී වැඩි ඡුන්ද ප‍්‍රතිශතයක් හිමිකර ගත්තේ, පොලිසියේ සහ හමුදාවේ කුමන්ත‍්‍රණයකින් බලයෙන් පහ කෙරුණු හිටපු ජනපති මොහොමඞ් නෂීඞ් ය.

නෂීඞ්ට හෝ සෙසු ප‍්‍රධාන අපේක්ෂකයන්ට හෝ සියයට 50 කට වැඩියෙන් ඡන්ද ප‍්‍රතිශතයක් හිමිකර ගැනීමට නොහැකි විය.

ඒ අනුව, ජනපතිවරණයේ දෙවැනි වටය, ඉකුත් 28 වැනිදා පැවැත්වීමට නියමිතව තිබුණි. ඒ, නෂීඞ් සහ නෂීඞ්ගේ ආසන්නතම ප‍්‍රතිවාදියා වූ අබ්දුල්ලා යෙමීන් අතරේ ය.

යෙමීන් ලබා ගත් ඡන්ද ප‍්‍රතිශතය සියයට 25 ක් විය. යෙමීන්, මාලදිවයිනේ දීර්ඝ කාලයක් ජනපති ධුරයේ සිටි අබ්දුල් ගයුම්ගේ ඥාතියෙක් ද වෙයි.