රුසියා ජනාධිපතිවරණයෙන් විශිෂ්ට ජයක් හිමිකර ගත් අගමැති ව්ලැඩිමීර් පුටින් එරට නව ජනාධිපති ලෙස, ක්‍රෙම්ලීනයේ ශාන්ත ඇන්ඩෲස් ශාලාවේදී, පෙරේදා (7) දිවුරුම් දුන් අතර දහසකට වැඩි පිරිසක් ක්‍රෙම්ලීනය ඉදිරිපිට විරෝධතා රැලියක් පැවැත්වූහ. විරෝධතාකරුවන් මර්දනය කිරීමට පොලිසිය උත්සාහ ගත් අවස්ථාවේදී ඔවුහු පොලිසිය සමඟ ගැටුණාහ. පොලිසිය ප‍්‍රකාශ කරන්නේ 408 දෙනකු අත්අඩංගුවට ගත් බවයි. එම පිරිස් පුටින් දූෂිත නායකයකු යැයි බැණ වදිමින් විරෝධතා රැලියට එක්ව සිටියේ සුදු පටි අත්වල බැඳගෙනය. මේ අතර පුටින්ට සහාය පළ කරමින් ද දෙදහසකට වැඩි පිරිසක් ක්‍රෙම්ලීනයේ ශාන්ත ඇන්ඩෲස් ශාලාවේ පැවැති දිවුරුම් දීමේ උත්සවයට සහභාගී වී සිටියහ. පුටින්, තවත් වසර 6 ක කාලයක් සඳහා දිවුරුම් දුන් අවස්ථාවේදී එම පිරිස් පී‍්‍රති ඝෝෂා පවත්වන්න වූහ. රුසියා පාර්ලිමේන්තුව ඊයේ (8) රැස්වූ අතර එම අවස්ථාවේදී පුටින්ගේ හිතවතා මෙන්ම හිටපු රුසියා ජනපතිවරයා ද වන දිමිති‍්‍ර මෙඞ්වදේව් නව අගමැති ලෙස පත් කිරීමට නියමිතව තිබුණි. මීට පෙර අවස්ථා දෙකකදී රුසියාවේ ජනපති ධුරය හොබවා ඇති පුටින්, පසුගිය 2006 වසරේ පැවැති රුසියා ජනපතිවරණයේදී අගමැති ධුරයට පත්වූයේ ඔහුගේ හිතවාදියකු වන දිමිති‍්‍ර මෙඞ්වදේව් ජනපති ධුරයට පත්වීමට ඉඩ සලසමින්ය. රුසියාවේ ව්‍යවස්ථාවට අනුව එක් අයකුට ජනපති ධුරය හෙබවිය හැක්කේ පිටපිට අවස්ථා දෙකකදී පමණි. පුටින්ට එරෙහිව රුසියාවේ විරෝධතා රැල්ලක් ආරම්භ වූයේ පසුගිය දෙසැම්බර් 4 වැනිදා පැවැති රුසියා මහ මැතිවරණයෙන් පසුවය. එම මහ මැතිවරණයෙන් ජය ගත්තේද පුටින්ගේ එක්සත් රුසියා පක්ෂයයි. එම මැතිවරණය වංචා සහ දූෂණ පිරි එකක් යැයි විපක්ෂයේ දේශපාලන කණ්ඩායම්  චෝදනා කරන්න විය. යළිත් වරක් ජනපතිවරණයට තමන් ඉදිරිපත් වන බව පුටින් නිවේදනය කළ අවස්ථාවේදී විපක්ෂ දේශපාලන කණ්ඩායම්වල උසි ගැන්වීමෙන් පුටින් විරෝධී විරෝධතා රැල්ලක් රට පුරා ආරම්භ විය.