යූසොෆ් රාසා ගිලානී පාකිස්තාන අගමැති ධුරයට නුසුදුසු යැයි එරට ශ්‍රේෂ්ඨාධිකරණය තීන්දු කිරීමත් සමඟ එම ධුරය සඳහා ඇඟලූම් කර්මාන්ත ඇමැති මක්ඩූම් ෂහබුදීන් නම් කිරීමට ජනපති අසීෆ් අලී සර්දාරි ඊයේ (21) පියවර ගත්තේය. නව අගමැතිවරයා ලෙස ෂහබුදීන් පත් කිරීමට අනුමැතිය ලබා ගැනීමේ අරමුණින් අද (22) දිනයේ පාර්ලිමේන්තුව කැඳවීමට ජනපති සර්දාරි බලාපොරොත්තු වෙයි. මක්ඩූම් ෂහබුදීන්, අගමැති ධුරය සඳහා සිය නාම යෝජනා පත‍්‍රය බාර දී ඇති අතර, එය යම් හෙයකින් ප‍්‍රතික්ෂේප වුවහොත් විකල්ප අපේක්ෂකයා ලෙස තවත් ඇමැතිවරුන් දෙදෙනකු නම් කිරීමට ද ජනපති සර්දාරි පියවර ගෙන තිබේ. තලේබාන් සංවිධානයේ ප‍්‍රචණ්ඩ කි‍්‍රයාවලින් පීඩා විඳිමින්, අල් කයිඩා සටන්කාමීන්ට රැකවල් ලබා දෙන බවට චෝදනා එල්ල වී ඇමෙරිකාවේ උදහසට ලක් ව සිටින අවස්ථාවක ගිලානී අගමැති ධුරයට නුදුසුදු යැයි ශ්‍රේෂ්ඨාධිකරණය තීන්දු කිරීම රටේ දේශපාලන අර්බුදයක් නිර්මාණය වීමට හේතුවිය. එම අර්බුදය විසඳා ගැනීමට ජනපති සර්දාරි තම පක්ෂය වන පාකිස්තාන ජනතා පක්ෂයේ සහ රජයේ සභාග පක්ෂවල ද මන්තී‍්‍රවරුන් සමඟ සාකච්ඡා කොට මක්ඩූම් ෂහබුදීන් අගමැති ධුරය සඳහා නම් කිරීමට තීරණය කළේය. අගමැති ගිලානි අග‍්‍රාමාත්‍ය ධූරය දැරීමට නුසුදුසු බව එරට ශ්‍රේෂ්ඨාධිකරණය තීරණය කළේ ඉකුත් 19 වැනිදාය. ඒ, පාකිස්තාන ජනපති අසීෆ් අලී සර්දාරිට එරෙහිව ඇති දූෂණ නඩු විභාග යළි ආරම්භ කරන ලෙස ස්විට්සර්ලන්ත රජයට දැනුම් දෙන්නැයි පාකිස්තාන ශ්‍රේෂ්ඨාධිකරණය දුන් නියෝගය පැහැර හැරීමෙන් ගිලානි අධිකරණයට අපහාස කිරීමේ චෝදනාවට වරදකරු වීම හේතුවෙනි. පාර්ලිමේන්තු මන්තී‍්‍රවරයකු අධිකරණයට අපහාස කරමින්, අධිකරණයක් හමුවේ වරදකරුවකු වුවහොත් ඔහුට මන්තී‍්‍ර අසුන අහිමි වේ. ගිලානි අගමැති ධුරයට නුදුසුසු යැයි ශ්‍රේෂ්ඨාධිකරණ තීන්දු කළේ එහෙයිනි.