ඉන්දියාවේ දිල්ලි, ගුජරාට සහ හිමාචල් ප්‍රාන්ත මැතිවරණවල ප්‍රතිඵල නිකුත් වුණු අතර, දිල්ලි ප්‍රාන්තයේ බලය තහවුරු කර ගැනීමට අරවින්ද් කෙජ්රිවාල්ගේ ‘ආම් ආද්මී’ පක්ෂය සමත් විය.

අග්‍රාමාත්‍ය නරේන්ද්‍ර මෝදිගේ ‘භාරතීය ජනතා පක්ෂය’ ගුජරාටයේ බලය තහවුරු කර ගත්තේ විශිෂ්ට අයුරිනි. හිමාචල් ප්‍රාන්තයේ බලය තහවුරු කර ගැනීමට රාහුල් ගාන්ධි විසින් මෙහෙයවනු ලැබූ ඉන්දියාවේ ප්‍රධාන විපක්ෂය වන ‘කොංග්‍රස්’ පක්ෂය සමත් විය. 2012 සිට හිමාචල් ප්‍රාන්තයේ බලයේ සිටින්නේ ‘කොංග්‍රස්’ පක්ෂයයි.

නවදිල්ලි අගනුවර ද අයත් දිල්ලියේ මහ ඇමැති ධුරය හොබවන්නේ ද කෙජ්රිවාල්ය. දිල්ලි ප්‍රාන්ත සභාවේ ආසන 250 කි. ආම් ආද්මී පක්ෂය ආසන 134 ක් දිනා ගත්තේය. අග්‍රාමාත්‍ය මෝදිගේ භාරතීය ජනතා පක්ෂයට දිනා ගැනීමට හැකි වූයේ ආසන 104 කි. ‘කොංග්‍රස්’ පක්ෂයට හිමිවූයේ ආසන 9 කි.

ගුජරාට ප්‍රාන්තය ඉන්දීය අග්‍රාමාත්‍ය මෝදි උපන් ප්‍රාන්තයයි. මෙවර ගුජරාට පමැතිවරණයට ද ප්‍රථම වරට ‘ආම් ආද්මී’ පක්ෂය ඉදිරිපත් විය. ඒ, මෝදිගේ ‘භාරතීය ජනතා පක්ෂයට’ අභියෝග කරමිනි. කෙසේ නමුත්, ‘භාරතීය ජනතා පක්ෂය’ ගුජරාට ප්‍රාන්තයේ අති විශිෂ්ට ජයක් හිමි කර ගත්තේය. ගුජරාට ප්‍රාන්තයේ ආසන 182 කි.

භාරතීය ජනතා පක්ෂය හිමි කරගත් ආසන ගණන 154 කි. එය විශිෂ්ට ජයක් බව පැවැසෙයි. අවසන් වරට 2017 දී පැවැති ගුජරාට මැතිවරණයේ දී ‘භාරතීය ජනතා පක්ෂය’ දිනා ගත්තේ ආසන ගණන 99 කි. දෙවැනි ස්ථානයට පත් වූයේ ‘කොංග්‍රස්’ පක්ෂයයි. ‘කොංග්‍රසය’ ආසන 19 කි. ‘ආම් ආද්මී’ පක්ෂය තෙවැනි ස්ථානයට පත්විය ඒ ආසන 3 ක් දිනා ගනිමිනි.

හිමාචල් ප්‍රාන්ත මැතිවරණයට ද ‘ආම් ආද්මී’ පක්ෂය ඉදිරිපත් විය. කෙසේ නමුත් කිසිදු ආසනයක් දිනා ගැනීමට ඔවුන්ට නොහැකි විය. හිමාචල් ප්‍රාන්ත සභාවේ ආසන 68 කි. ‘කොංග්‍රසය’ හිමාචල් ප්‍රාන්තයේ බලය තහවුරු කර ගත්තේ ආසන 36 කට වඩා දිනා ගනිමිනි. ‘භාරතීය ජනතා පක්ෂය’ දිනාගත් ආසන ගණන 29 කි.

(එන්.ඩී.ටීවී.)