තුර්කියේ හටගෙන ඇති රාජ්‍ය විරෝධී උද්ඝෝෂණ දිනෙන් දින උත්සන්න වීමත් සමඟ එරට අගමැති රිසෙප් ටයිප් එඞ්රෙගොන් ඊයේ (4) ජනතාව අමතමින් කියා සිටියේ, ටියුනීසියාවේ, ලිබියාවේ සහ ඊජිප්තුවේ සිදුවූවාක් මෙන් ‘අරාබි වසන්තයක්’ තුර්කියට උදා වීමට ඉඩ නොදෙන බවය.
2011 වසරේ දී ටියුනීසියාවේ, ඊජිප්තුවේ සහ ලිබියාවේ පැවැති රාජ්‍ය විරෝධී ජනතා නැගී සිටීම ඇමෙරිකාව ප‍්‍රමුඛ බටහිර රටවල් නම් කළේ ‘අරාබි වසන්තය’ ලෙසය.
නේටෝ සාමාජික රටක් වන තුර්කියේ රාජ්‍ය විරෝධී උද්ඝෝෂණ ඇරැඹුණේ ඉස්තාම්බුල් නුවර උද්‍යානයක සාප්පු සංකීර්ණයක් ඉදිකිරීමට රජය තීරණය කිරීමත් සමඟය.
එම උද්ඝෝෂණවලට මුලින්ම එක් වූයේ සරසවි සිසුන්ය. ඊයේ (4) වනවිට ඊට එරට වෘත්තීය සංගම් ද එක් වී ඇතැයි විදෙස් පුවත් සේවා වාර්තා කළේය.
තුර්කි අගමැති වහාම ධුරයෙන් ඉවත් වන්නැයි බල කරමින්,  එම විරෝධතා ඇරැඹිණි. විරෝධතාකරුවන් පිරිසක් අගමැති කාර්යාලය ඉදිරිපිට ද විරෝධතා රැුලියක් පැවැත් වූ බවත් එම පිරිසට බැටන් ප‍්‍රහාර එල්ල වූ බවත් වාර්තා විය.
කලක් තුර්කියේ මිතුරකුව සිටි සිරියා ජනාධිපති බෂීර් අල් අසාද් චෝදනා කරන්නේ තුර්කි අගමැති තම ජනතාව පීඩාවට පත් කරන බවටය. තුර්කි අගමැතිවරයා පවසා ඇත්තේ කොතරම් බාධා ආවත් ඉස්තාම්බුල් නගරයේ නවීකරණ කටයුතු නවත්වන්නේ නැති බවය.

තුර්කි අගමැති