තායිලන්තයේ විපක්ෂය නියෝජනය කරන රතු කමිස ව්‍යාපාරයට අනුබද්ධ රූපවාහිනි නාළිකා දෙකක් දින හතකට තහනම් කිරීමට එරට හමුදා පාලනය  කටයුතු කර ඇතැයි විදෙස් පුවත් සේවා අද (31) වාර්තා කළේය.

හමුදා නීතිය යටතේ   තායිලන්තය පළමු වරට රූපවාහිනි නාළිකාවක් තහනම් කරනු ලැබුවේ ඉකුත් මැයි මාසයේදීය. එම නාළිකාවට පැනවූ තහනම ඉන් මාස තුනකට පසු ඉවත් කරනු ලැබුවේ කිසිදු දේශපාලන වැඩසටහනක් විකාශය නොකිරීමේ කොන්දේසිය යටතේය.

ඒකාධිපතිත්වයට එරෙහි ප්‍රජාතන්ත්‍රවාදය වෙනුවෙන් වූ එක්සත් පෙරමුණ හෙවත් රතු කමිස ව්‍යාපාරයේ නායක ජාටුපෝ ප්‍රොම්පාන් වාරණයට ලක්වූ රූපවාහිනි නාළිකා දෙකේ දිනපතාම වැඩසටහන්වලට එක් විය.

2006 වසරේදී තක්ෂීන් ෂිනවත්‍රා බලයෙන් පහ  කළ අවස්ථාවේ සිටම තවමත් තායිලන්තයේ දේශපාලන අර්බුද පවතින අතර තක්ෂීන් විරෝධීන් වන කහ කමිස ව්‍යාපාරයේ රූපවාහිනි නාළිකා තහනම් කිරීමටද වරෙක හමුදා පාලනය කටයුතු කළේය.

මෙවැනි තත්ත්වයක් තුළ තායලන්තයට සහජීවනය හා සාමය ගෙන ආ නොහැකි බව දේශපාලන විශ්ලේෂකයෝ පෙන්වා දෙති.

බැන්කොක්හිදීය (ඒ.එෆ්.පී)