‘ජී20’ සමුළුව අතරතුරේ චීන ජනාධිපති ෂී ජින්පින් මුහුණට මුහුණ හමුවී දෙරට අතර පවතින අර්බුද අවසන් කර කිරීම සඳහා සාකච්ඡා පැවැත්වීමට තමන් සුදානමින් සිටින බව ඇමෙරිකන් ජනාධිපති ජෝ බයිඩන් පවසා තිබේ.

‘ජී20’ සමුළුව ලබන සතියේ ආරම්භ වෙයි. ජනාධිපති බයිඩන් උපුටා දක්වමින්, ධවල මන්දිරය නිකුත් කළ නිවේදනයක දැක්වෙන්නේ බයිඩන් සහ චීන ජනාධිපති ජින්පින් අතර හමුව ලබන 14 වැනිදා පැවැත්වෙනු ඇති බවය.

ඇමෙරිකාව සහ චීනය අතරේ පවතින මත ගැටුම් දුරුකරලීමටත්, දෙරට අතර පළුදු වී ඇති සබඳතා යළි ශක්තිමත් කර ගැනීමටත් බයිඩන් කටයුතු කරනු ඇතැයි ධවල මන්දිරය පැහැදිලි කර ඇත.
ආර්ථික ප්‍රතිපත්ති සම්බන්ධයෙන් මෙන්ම, රුසියන් යුක්රේන අර්බුදයේ දී චීනය රුසියාවට පක්ෂව කටයුතු කිරීම මෙන්ම චීන තායිවාන අර්බුදය කෙරෙහි ද බයිඩන් සහ ජින්පින් අතරේ අවධානය යොමු වනු ඇති බව ධවල මන්දිරය වැඩි දුරටත් පවසා තිබේ.

තායිවානය චීනය අසල පිහිටි කුඩා දූපත් රාජ්‍යයක් වන අතර, තායිවානය චීනයට අයත් කොටසක් ලෙස චීනය විහ්වාස කරයි. තායිවානයේ ස්වෛරීත්වය වෙනුවෙන් ඇමෙරිකාව, තායිවාන රජයට සහාය දෙයි. මෙය චීනයේ උදහසට හේතුවක් වී ඇත.

මානව හිමිකම් කඩවීම් සම්බන්ධයෙන් ඇමෙරිකාව චීනයට චෝදනා නගා ඇත. තායිවාන අර්බුදය සම්බන්ධයෙන් පමණක් නොව, එම චෝදනා සම්බන්ධයෙන් ද ජනාධිපති බයිඩන්, චීන ජනාධිපති ජින්පින් සමඟ විවෘතව සාකච්ඡා කරනු ඇතැයි ධවල මන්දිර වාර්තා පවසයි.

‘ජී20’ යනු ලොව ආර්ථික බලවත් රටවල එකමුතුවයි. ‘ජී20’ රටවල නායකයන් වාර්ෂිකව රැස්වෙයි. මෙවර ‘ජී20’ සමුළුව පැවැත්වෙන්නේ ඉන්දුනීසියාවේ බාලි පළාතේය. ‘ජී20’ සමුළුවේ සත්කාරකරු ලෙස කටයුතු කරන්නේ ඉන්දුනීසියානු ජනාධිපති යෝකෝ විඩෝඩෝ වන අතර, සමුළුවට පැමිණෙන ලෝක නායකයන් උණුසුම් ලෙස පිළිගැනීමට ජනාධිපති විඩෝඩෝ සූදානමින් සිටී.

(ඒ.එෆ්.පී.)