එක්සත් ජාතීන්ගේ මානව හිමිකම් සමුළුව අද (27) ස්විට්සර්ලන්තයේ ජිනීවා නුවරදී ආරම්භ වීමට නියමිත අතර, එහිදී සිරියා අර්බුදයට විසඳුමක් සෙවීම ගැන වැඩි අවධානයක් යොමු කිරීමට නියමිතය. සිරියාවට අමතරව ශ්‍රී ලංකාව, ඉරානය, ලිබියාව, මියන්මාරය, අයිවරි කෝස්ට් සහ උතුරු කොරියාව යන රටවල මානව හිමිකම් උල්ලංඝනයන් ගැන ද සමුළුවේ අවධානය යොමු වේ. වාර්ෂිකව පැවැත්වෙන එක්සත් ජාතීන්ගේ මානව හිමිකම් සමුළුවේ කටයුතු ආරම්භ වනු ඇත්තේ, එහි මහ ලේකම් නාවි පිල්ලේගේ සහ සභාපති, කටාර් රාජ්‍ය නියෝජනය කරන නසීර් අබ්දුල්ලාසීස් අල් නසාර්ගේ ප‍්‍රධානත්වයෙනි. සමුළුවේ ආරම්භක දින තුනේදී සම්පූර්ණ අවධානය සිරියාව වෙත යොමු කර, එරට හටගෙන ඇති අර්බුදකාරී තත්ත්වයට විසඳුමක් සෙවීමට වෙහෙසන බව  මහ ලේකම් නාවි පිල්ලේ පවසයි. මනුෂ්‍යත්වයට එරෙහිව අපරාධ සිදු කළැයි සිරියා ජනපති බෂීර් අල් අසාද්ට චෝදනා එල්ල වී ඇත. ඔහුට අමතරව මානව හිමිකම් උල්ලංඝනය කළේ යැයි සැක කෙරෙන සිරියා හමුදා නිලධාරීන් සහ රාජ්‍ය නිලධාරීන්ගේ නම් ලැයිස්තුවක් ද තමන්ට ලැබී ඇතැයි මහ ලේකම් නාවි පිල්ලේ වැඩි දුරටත් කියා සිටියි. මානව හිමිකම් සමුළු මහ ලේකම්වරයා අවධාරණය කරන්නේ සිරියාවට එරෙහි යෝජනාවලියක් ගෙන ඒමට ජාත්‍යන්තර රටවලට බලපෑමක් කිරීමට තමන් බලාපොරොත්තු වන බවය. රටවල් 90 ක ඇමැතිවරු සහ රාජ්‍ය නිලධාරීහු අද පැවැත්වෙන සමුළුවට සහභාගී වෙති. ඔවුන් අතර ප‍්‍රංශයේ, ජර්මනියේ, ස්පාඤ්ඤයේ සහ ඊජිප්තුවේ විදේශ කටයුතු ඇමැතිවරුන් ද ලිබියාවේ නව අගමැති අබ්දෙල් රහීම් අල් කිබ් ද සිටිති.