සුජිත් හේවාජුලිගේ

ඒකාබද්ධ විපක්ෂයේ නුගේගොඩ රැලියෙන් පසු සෙසු දේශපාලන පක්ෂ ද රට පුරා මහජන රැලි පවත්වමින් දේශපාලන ප්‍රචාරක වැඩපිළිවෙළ වේගවත් කිරීමට තීරණය කර ඇත.

මේ අනුව සමග ජන බලවේගය ආණ්ඩුවේ වැඩපිළිවෙළට එරෙහිව පුළුල් ප්‍රචාරක වැඩසටහනක් ජනවාරියේ අරඹන බව එම පක්‍ෂයේ පාර්ලිමේන්තු මන්ත්‍රී හෙක්ටර් අප්පුහාමි පැවසීය.

එසේම ඒකාබද්ධ විපක්ෂයේ රැලිය මෙන් ප්‍රධාන රැලියක් ද නුදුරේදීම සංවිධාන කිරීමට එම පක්ෂය බලාපොරොත්තුවේ.

මෙම ප්‍රචාරක වැඩපිළිවෙළ වෙනුවෙන් ප්‍රතිපාදන සොයා ගැනීමේ කටයුතු ද ආරම්භ කළ බව එම පක්‍ෂ ආරංචි මාර්ග සඳහන් කළේය. 

ශ්‍රී ලංකා පොදු ජන පෙරමුණ ප්‍රධාන ඒකාබද්ධ විපක්ෂයේ  නුගේගොඩ රැලියට ජනතාව කොපමණ සහභාගී වූයේද යන්න ගැන රජයේ බුද්ධි අංශ විශේෂ විමර්ශනයක් ආරම්භ කර ඇත. එම විමර්ශන කණ්ඩායම ඒ පිළිබඳව රජයට ඉදිරි දිනවල වාර්තාවක් භාරදීමට නියමිතය.

නුගේගොඩ රැලිය සම්බන්ධයෙන් අප කළ විමසුමකදී අදහස් දැක්වූ  කම්කරු නියෝජ්‍ය අමාත්‍ය මහින්ද ජයසිංහ පැවසුවේ එම රැලිය රජයේ වැඩපිළිවෙළට කිසිදු අභියෝගයක් නොවෙන බවයි.

දූෂණයෙන් වංචාවෙන් තොර ආණ්ඩුවේ අවංක දේශපාලන ගමනට සැබෑ දේශප්‍රේමී ජනතාවගේ සහාය දිගටම පවතින බවත් චෞර වළල්ලකට රට භාරදීමට මේ රටේ ජනතාව නැවත කිසිසේත්ම සූදානම් නැති බවත් ඔහු ප්‍රකාශ කළේය.