ඉස්ලාමාබාද් අධිකරණය ඉදිරියේ පුපුරා ගිය මරාගෙන මැරෙන බෝම්බ ප්රහාරයේ වගකීම බාර ගනිමින්, පාකිස්තාන තලේබාන් ත්රස්ත සංවිධානය පාකිස්තාන රජයට අනතුරු ඇඟවීමක් කළේය. ඒ, දිගින් දිගටම ප්රහාර එල්ල කරන බව පවසමිනි.
ඉස්ලාමාබාද් අගනුවර අධිකරණය ඉදිරිපිට බෝම්බ පිපිරීම සිදුවූයේ දිනයේය. එම මරාගෙන මැරෙන බෝම්බ ප්රහාරයෙන් මියගිය ගණන 12 කි. තුවාල ලබා රෝහල්ගත කළ ගණන 29 කි. අධිකරණයේ ආරක්ෂාවට සිටි පොලිස් නිලධාරීන් කීප දෙනකු ද මියගිය අය අතරේ සිටින බව පැවැසෙයි.
පාකිස්තාන තලේබාන් ත්රස්ත සංවිධානය හැඳින්වෙන්නේ ‘තරීක් ඊ තලේබාන් පාකිස්තාන්’ යන නමිනි. මෙම ත්රස්ත සංවිධානය පිහිටුවීම සිදුවූයේ 2007 දෙසැම්බරයේය. ඒ, බයිතුල්ලා මෙහ්සූඩ්ගේ නායකත්වයෙනි. වර්තමානයේ මෙම ත්රස්ත සංවිධානයේ නායකයා වන්නේ නූර් වලි මෙසූඩ්ය.
ඇෆ්ගන් තල්බාන් රජයේ සහාය මෙම ‘තරීක් ඊ තලේබාන් පාකිස්තාන්’ ත්රස්තවාදීන්ට නොඅඩුව හිමිවෙයි. මොවුන් ඇෆ්ගන් පාකිස්තාන දේශසීමාවේත්, පාකිස්තානයේ කයිබර් පක්තුන්ක්වා පළාතේත් ක්රියාත්මකය.
පාකිස්තාන රජය පෙරළා ෂරීයා නීතිය සහිත ඉස්ලාමීය රාජ්යයක් පාකිස්තානයේ පිහිටුවීම මෙම ත්රස්ත සංවිධානයේ අරමුණ වී ඇත. පාකිස්තාන ආරක්ෂක අංශ, රාජ්ය නිලධාරීන් සහ පාකිස්තාන සිවිල් වැසියන් ඉලක්ක කර ගනිමින් මොවුහු ප්රචණ්ඩ ක්රියා සිදු කරති.
