සුජිත් හේවාජුලිගේ
ව්‍යාජ සමාජ මාධ්‍ය ගිණුම් උපයෝගී කරගනිමින් මෙරට විවිධ ජාතීන් හා ආගමික ප්‍රජාවන් අතර නොසන්සුන්තා හා ගැටුම්කාරී වාතාවරණයක් ඇති කිරීමට උත්සාහ දරන්නේ යැයි කියන විවිධ තරාතිරම්වල විස්සකට ආසන්න පිරිසක් සම්බන්ධයෙන් අපරාධ පරීක්ෂණ දෙපාර්තමේන්තුව සහ බුද්ධි අංශ විමර්ශන ආරම්භ කර ඇත.
මෙම ගැටලුව සම්බන්ධයෙන් රජය විශේෂ අවධානය යොමුකර ඇතැයි, මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල පැවසීය.
මෙම ඇතැම් සමාජ මාධ්‍ය ගිණුම් මෙහෙයවනු ලබන්නේ විදේශයන්හි සිට හෙයින්, එවැනි ක්‍රියාකාරකම්වල නිරතව සිටින පුද්ගලයන් පිළිබඳව අදාළ රාජ්‍යයන්හි ශ්‍රී ලංකා තානාපති කාර්යාල මාර්ගයෙන්ද තොරතුරු ලබා ගැනීමට රජය විශේෂ වැඩපිළිවෙළක් ආරම්භ කර ඇත.
ඇතැම් අය යම් යම් දේශපාලනඥයන්ගේ උසිගැන්වීම් අනුව මෙලෙස කටයුතු කරන බවට ද තොරතුරු හෙළිවී ඇතැයි පොලීසිය පවසයි.
වෛරී ප්‍රකාශ පැතිරවීම සම්බන්ධයෙන් පසුගිය වසර දහයක කාලයේ දී අපරාධ පරීක්ෂණ දෙපාර්තමේන්තුව සහ ත්‍රස්ත විමර්ශන කොට්ඨාසය පැමිණිලි හයක් සම්බන්ධ පරීක්ෂණ පවත්වා ඇති බවද අමාත්‍යවරයා ප්‍රකාශ කළේය.
ශ්‍රී ලංකාවේ සමාජ මාධ්‍ය පරිශීලනය ශීඝ්‍රයෙන් ඉහළ යෑමත් සමග, මෙරට මෙන්ම විදෙස්ගතව සිටින ඇතැම් පුද්ගලයන් ව්‍යාජ ගිණුම් සකස් කර ගනිමින් ජනකොටස් අතර ජාතිවාදී හා ආගම්වාදී වෛරය ව්‍යාප්ත කිරීමට කටයුතු කරමින් සිටින බව අමාත්‍යවරයා පෙන්වා දුන්නේය.
එමෙන්ම මෙවැනි සිදුවීම් විමර්ශනය කිරීමේ දී නීතිය ක්‍රියාත්මක කරන බලධාරීන්ට ප්‍රායෝගික බාධා රැසකට මුහුණදීමට සිදුව ඇති බව පැවසූ අමාත්‍යවරයා, ඇතැම් සිදුවීම් සම්බන්ධයෙන් නිල පැමිණිලි නොලැබීම, ඇතැම් සමාජ මාධ්‍ය ගිණුම් විදෙස් රටවල සිට මෙහෙයවීම සහ පවතින නීතිමය රාමුවේ පවතින සීමාවන් එම බාධා බවද සඳහන් කළේය.
කෙසේ වෙතත්, එම ව්‍යාජ ගිණුම් පිටුපස සිටින පුද්ගලයන් නිශ්චිතව හඳුනාගෙන නීතිය හමුවට පැමිණවීමට පොලිසිය අඛණ්ඩ ක්‍රියාමාර්ග ගනිමින් සිටින බවද ඔහු අවධාරණය කළේය.
