(චමිල් රූපසිංහ)
මාවනැල්ල ප්‍රාදේශීය සභාවේ සභාපති ඇතුලු මන්ත්‍රීවරු අද (13) ශ්‍රී ලංකා මානව හිමිකම් කොමිෂන් සභාවේ මහනුවර ප්‍රාදේශීය කාර්යාලයේ පැමිණිල්ලක් ගොනු කළහ.
ප්‍රාදේශී සභා පනත අනුව දින නියම කරගත් මාසික මහා සභාවාරය සියලුම සෞඛ්‍ය ආරක්ෂිත ක්‍රම හා නීති රීති අනුව පසුගිය (10) දින පවත්වන විට මාවනැල්ල පොලිසිය පැමිණ එය නැවැත්වීම, පනතකින් තව පනතක් අභිබවා ගොස් අධිකරණය නොමග යවා පොලිසිය විසින් ගත් තීරණයක් බව සදහන් කරමින් ඔවුහු පැමිණිල්ල ගොනුකළහ.
හුදකලා කර ඇති රුවන්වැල්ල ප්‍රාදේශීය සභාවේ සභාවාරය සෞඛ්‍ය නීතිරීති වලට අනුව පැවැත්වූ බවත් එම සභාවට එක නීතියක් හා මාවනැල්ල සභාවට එක නීතියක් ඇයිදැයි ප්‍රාදේශී සභාවේ සභාපති මන්දන කුමාර මහතා පැවැසීය.
ප්‍රාදේශීය සභා පනත අනුව සභාවේ මන්ත්‍රිවරුන් 40 දෙනා සහභාගීත්වයෙන් දින නියම කරගත් දිනයට සභාව පැවැත්විය යුතු බවත් එදින සභාවාරය සදහා පක්ෂ විපක්ෂ මන්ත්‍රීවරුන් 35 දෙනෙකු පැමිණි බවද ඔහු සදහන් කළේය.
නිරෝධායන නීති අනුව සභාපතිවරයා විසින් සභාව පැවැත්වු බවත්, පළාත් පාළන අමාත්‍යාංශයෙන් අනුමැතියද ප්‍රාදේශීය සෞඛ්‍ය නිලධාරිතුමාගෙන්ද අනුමැතිය ගෙන ඔහු කැදවු බවත්, මහජන සෞඛ්‍ය පරික්ෂකවරු පැමිණ සිටි බවත්, දුරස්ථභාවය තබා කටයුතු කළ බවත්, එසේ තිබියදිත් මෙයට විරුද්ධව අධිකරණය නොමග යවා ඇති බවත්, මන්ත්‍රීවරුන් ලෙස අධිකරණයට නීතියට ගරු කරනු ලබන බවත් මෙම ප්‍රාදේශීය සභා පනත ලංකාවටම හදපු පනතක් බවත්, පනතකින් පනතක් අභිබවා පොලිසිය කටයුතු කර ඇති නිසා මේ සම්බන්ධව මානව හිමිකම් කොමිසන් සභාවට පැමිණිල්ලක් කළ බවත් ඔවුහු පැවසූහ.
මෙම අවස්ථාවට ජාතික ජනතා පක්ෂෙය් මාවනැල්ල ප්‍රාදේශීය සභා මන්ත්‍රි චන්දන රුවන් කුමාර දයාරත්න මහතා සහ ජනතා විමුක්ති පෙරමුණේ මන්ත්‍රි කේ ජයන්ත මහතාද සහභාගි වූහ.
