(රොමේෂ් මධුෂංඛ)
 
මන්නාරම සමූහ මිනීවලෙන් හමුවූ සිරුරුවල කාලනිර්ණය පිළිබඳ කාබන් පරීක්ෂණ වෙනුවෙන් ෆ්ලෝරිඩා කාබන් පරීක්ෂණ රසායනාගාරයට  යැවූ සාම්පලවල වාර්ථාව හෙට(14) ලැබෙනු ඇති  බව විශේෂඥ අධිකරණ වෛද්‍ය නිලධාරි සමින්ද රාජපක්ෂ මහතා පැවසීය.
 
වෛද්‍ය සමින්ද රාජපක්ෂ මහතා පැවසූවේ සමූහ මිනීවල සම්බන්ධයෙන් 144 වන අද(13) දිනද පරීක්ෂණ පවත්වමින් ඇති බවයි.
 
මිනීවලෙන් සොයාගත් අස්ථි කොටස් අතරින් කාබන් පරීක්ෂාවට යොමු කළ සාම්පල් හයක් ජනවාරි 23 වැනිදා ෆ්ලෝරිඩාවේ කාබන් පරීක්ෂණ රසායනාගාර වෙත ලබාදුන් අතර, අදාළ පරීක්ෂණ වාර්ථාව හෙට(14) වන විට ලැබීමට නියමිත බවද රාජපක්ෂ මහතා වැඩිදුරටත් පැවසීය.
 
එම වාර්තාව තමන් හා මන්නාරම මහේස්ත්‍රාත් අධිකරණය වෙත ලිඛිතව යොමු කරන ලෙසට අදාළ රසායනාගාර දැනුවත් කොට ඇති බව ද ඔහු කීය.
 
මන්නාරම මහේස්ත්‍රාවරයාගේ නියෝග යටතේ අධිකරණ වෛද්‍ය විද්‍යව පිළිබඳ විශේෂඥ වෛද්‍යවරුන් කණ්ඩායමක්, පුරාවිද්‍යාව පිළිබඳ විශේෂඥ කැලණිය විශ්වවිද්‍යාල ජ්‍යේෂ්ඨ මහාචාර්ය රාජ් සෝමදේව මහතා, අතුරුදහන්වූවන් පිළිබඳ කාර්යාලයේ නියෝජිතවරුන්, රාජයේ රස පරීක්ෂක නිලධාරීන් සහ රජයේ නීතීඥවරුන් ඇතුළු කණ්ඩායමක් හමුවේ අදාළ කාබන් පරීක්ෂාවට යොමු කිරීමට නියමිත අස්ථි කොටස් සාම්පල ලබා ගැණිනි.
 
මන්නාරම පැරණි සතොස ගොඩනැලිල්ල කඩා දැමීමෙන් ඉවත් කළ පස් රැගෙන ගිය මන්නාරම එමිල් නගර් ප්‍රදේශයේ පස් ගොඩක තිබී මාර්තු 26 වැනිදා අස්ථි කොටස් තොගයක් හමුවීමෙන් අනතුරුව මන්නාරම සමූහ මිනීවලේ පරීක්ෂණ පැවැත්වීම ආරම්භ කෙරිණි.