(මොහොමඩ් ආසික් )
පූජාපිටිය ප්‍රාදේශිය සභා බල ප්‍රදේශය තුලින් කොවිඩ් 19 වයිරසය ආසාදිත බවට සැක සහිත රෝගීන් තිදෙනෙකු හමු වීමත් සමඟ අද (28) ඇඳිරි නීතිය ඉවත් කළද එහි නිති රිති ඉතා තදින්ම ක්‍රියාත්මක කිරිමට තීරණය කර ඇති බව පූජාපිටිය ප්‍රාදේශිය සභාවේ සභාපති අනුර ප්‍රනාන්දු මහතා කීය.
මහනුවර දිස්ත්‍රික්කයේ වෙසෙන, නිවාඩු පැමිණි නාවික සෙබළුන්ගෙන් තිදෙනෙකු පූජාපිටිය කොට්ඨසයට අයත් වීම නිසා ඇදිරි නීතිය ඉවත් කළ අවස්ථාවන්වල ක්‍රියාත්මක කිරීමට රජය නිර්දේශ කර ඇති හැඳුනුම්පත් අංක ක්‍රමය ඉතා තදින් ක්‍රියාත්මක කිරීමට පොලිසිය ක්‍රියා කරන බවත් පොලිසියේ සහාය සඳහා හමුදාවේ සහායද ලබා ගන්නා බවත් සභාපති අනුර ප්‍රනාන්දු මහතා තව දුරටත් කීය.
මෙහිදී සභාපති අනුර ප්‍රනාන්දු මහතා ප්‍රදේශයේ ජනතාවගෙන් ඉල්ලා සිටියේ ඇඳිරි නිතිය ඉවත් කර තිබුණද, අත්‍යාවශ්‍ය සේවාවක් සඳහා පමණක් නගරවලට පැමිණෙන ලෙසත් එසේ පැමිණෙන්නේ නම් එක් නිවසකින් එක් අයෙකු පමණක් පැමිණ තම කාර්යය ළඟම වෙළඳසැලෙන් ඉටු කර ගෙන ඉතා ඉක්මනින් පිටත්ව යන ලෙසත් අනවශ්‍ය ලෙස නගරවල සහ මහාමාර්ගවල රැඳී නොසිටින ලෙසත් පවතින තත්වයේ බරපතලකම තේරුම් ගෙන වැඩ කරන ලෙසත්ය.
