පෙම්වතුන් ලෙස හමුවී දරුවන් ලැබූ බ්‍රසීලයේ යුවලක් තමන් එකම මවකගේ දරුවන් බව දැන මහත් අසීරුතාවකට පත්ව ඇතැයි විදෙස් මාධ්‍ය වාර්තා කරයි. ඇය එඩ්රියානා ය. ඇයට වයස අවුරුද්දක් වෙද්දී මව ඇය අතහැරදමා ගොසිනි. දැන් ඇය 39 වැනි වියේ පසුවෙයි. ඇගේ පෙම්වතා ලියන්ඩ්‍රෝ 37 හැවිරිදිය. ඔහු මව යැයි කියන්නේ කුඩම්මාට බව දැන ගත්තේ අට හැවිරිදි වියේ දී ය. මව සොයාගත නොහැකි වූ ඔහු විවාහ වී දරුවන් තිදෙනකුගේ පියකු වූවේය. ඒ විවාහය බිඳ වැටීමෙන් පසු ඔහුට එඩ්රියානා හමුවිය. පෙම්වතුන් වූ මේ යුවල එකට ජීවත්වීමට පටන්ගෙන දැන් වසර හතකි. ඔවුන් දෙදෙනාට හය හැවිරිදි දියණියක ද සිටියි.
මේ යුවලට ම තමන් අතහැර ගිය මව සෙවීමේ අවශ්‍යතාවක් තිබිණි. දෙදෙනාගේ ම මවගේ නම මාරියා නම් වූවාය. මාරියා යන නම බ්‍රසීලයේ ඉතා සුලබ නමකි. එරට ගුවන්විදුලි නාලිකාවක විකාශය වන නැතිවූ අය සොයා දෙන වැඩසටහනකට සහභාගීවූ එඩ්රියානා තම මව ගැන එ් වැඩසටහනට විස්තර කීවාය. නොබෝ දිනකින් මව ගැන තොරතුරු ලැබිණි. මහත් සතුටින් මව හමුවී කතා බහ කරද්දී දැනගත්තේ ලියන්ඩ්‍රෝ සොයන මව ද එඩ්රියානාගේ මව බවයි.
දැන් එකට ජිවත්වෙමින් දරුවකු බිහිකර ඇත්තේ එකම මවගේ කුසින් එළිය දුටු අක්කාත් මල්ලීත් වීම විදෙස් මාධ්‍යයට පුවතක් වී ඇත.
එඩ්රියානා ඒ ගැන මෙසේ කියයි.
‘‘ මම ලියන්ඩ්‍රෝට බොහෝ සෙයින් ආදරය කරනවා. අප දෙදෙනා වෙන්කළ හැකිවන්නේ මරණයෙන් පමණයි. මේ සියලු දේ සිදුවුණේ දෙවියන්ගේ කැමැත්ත අනුව. කලින් දැන සිටියානම් මෙවැනි දෙයක් සිදු වන්නේ නැහැ. අපි දෙදෙනාගේ ම අම්මා එකම නමකින් යුතු වීම සිනහ උපදවන්නක් වුවත් එය ඉතා සුලබ නමක් නිසා අපි එය එතරම් ගණන් ගත්තේ නැහැ. “
මොවුන් දෙදෙනා ම පවසන්නේ එකම මවකගේ දරුවන් බව නොදැන පෙම්වතුන් වූ තමන්ට නොදන්නා දෙයක් හෙළිදරව් වූවායැයි බාධාවක් ඇතිනොවන බවයි.
