(අංජුල මහික වීරරත්න)
බිම්ස්ටෙක් සාමාජික රටවල තරුණ ප්‍රජාව සවිබල ගැන්වීම සහ ඔවුන්ගේ විවිධ හැකියාවන් ආර්ථික සහ සමාජීය සංවර්ධනය සඳහා යොදා ගැනීම අරමුණු කරගත් පළමු තරුණ සමුළුව ඉන්දියාවේ අහමදාබාද් හි දී ආරම්භ විය.
ඉන්දියාවේ තරුණ කටයුතු හා ක්‍රීඩා අමාත්‍ය මන්සුඛ් මන්දාවියා, එරට තරුණ කටයුතු සහ ක්‍රීඩා රාජ්‍ය අමාත්‍ය රක්ෂා ඛාඩ්සෙ, ගුජරාටි ප්‍රාන්තයේ මහ ඇමති ශ්‍රී භුපේන්ද්‍ර රජ්නිකාන්ත් පටේල්, විදේශ කටයුතු අමාත්‍යාංශයේ ලේකම් (නැගෙනහිර) ශ්‍රී ජයදීප් මසුම්බර් මහත්වරුන්ගේ ප්‍රධානත්වයෙන් අහමදාබාද්හි ගාන්ධි මන්දිර්හිදී මෙම සමුළුව ආරම්හ කෙරුණි.
එම අවස්ථාවට බිම්ස්ටෙක් රටවල් හත නියෝජනය කරමින් සහ ඉන්දියාවේ මයි භාරත් සංවිධානය නියෝජනය කරමින් තරුණ තරුණියෝ එක්ව සිටියහ.
බිම්ස්ටෙක් තරුණ සමුළුවට සහභාගී වීම සඳහා තරුණ කටයුතු නියෝජ්‍ය අමාත්‍ය එරංග ගුණසේකර මහතා ඇතුළු නියෝජිතයෝ ද ඉන්දියාවට ගොස් සිටිති.
"තොරතුරු තාක්ෂණය සහ ඩිජිටල්කරණය තරුණ ප්‍රජාව සවිබල ගැන්වීමට සහ යහපාලනයට යොදා ගැනීම " තේමාව යටතේ මෙම සමුළුව පෙබරවාරි 10 වෙනිදා දක්වා පැවැත්වේ.
