(රෝෂන් තුෂාර)

රුපියල් ලක්ෂ 619ක(61961961.00) වැට් බදු නොගෙවා පැහැරහරින ලදැයි කියන දොඩංගොඩ ඉදිකිරීම් සමාගමක අධ්‍යක්ෂකවරයෙකුට එරෙහිව දේශීය ආදායම් කොමසාරිස් විසින් පැවරූ නඩුව නිෂ්ප්‍රභා කිරීමට කොළඹ අතිරේක මහේස්ත්‍රාත් බණ්ඩාර ඉළංඟසිංහ මහතා අද (18) නියෝග කළේය.

නඩු පැවරීමේදී සමාගම විත්තිකරුවකු ලෙස නම්කර නොමැති වීම සහ වරද සිදුකර වසර පහකට පසුව නඩු පැවරීම යන කරුණු මත පැමිණිල්ලපවරා පවත්වාගෙන යෑමට නොහැකි බවට විත්තියේ නීතිඥ ඒ. ඒ. තිලකරත්න මහතා ගොනු කළ විරෝධතාවයක් සලකා බැලීමෙන් පසුව නඩුව නිශ්ප්‍රභා කෙරිණි.

දොඩංගොඩ, රේන්ද පොළ ජෙනුයින් පුද්ගලික සමාගමේ අධ්‍යක්ෂ නිරෝෂන් නීශාන්ත නැමැති අය විත්තිකරු කරමින් මෙම නඩුව පවරා තිබිණි .

2016,2017වසර වල කාර්තු තුනක මාස තිහක් සඳහා  නොගෙවා පැහැර හැරී රුපියල් 61961961.00 වැට් බදු අය කර ගැනීම සඳහා 2023 මාර්තු 02 දින මෙම නඩුව මහේස්ත්‍රාත් අධිකරණය හමුවේ ගොනුකර ඇති බව විත්තිය මගින් අධිකරණයට කරුණු ඉදිරිපත් කර ඇත.

විරෝධතා සලකා බැලූ මහේස්ත්‍රාත්වරයා අදාළ පැමිණිල්ල යළි පැවරීමේ අයිතිය රඳවා තබමින් නිෂ්ප්‍රභ කළේය.