මීට මාස දෙකහමාරකට පමණ පෙර සෞදි රාබියේ ගෘහසේවිකාවක් ලෙස පැවති ශ්‍රී ලාංකික කාන්තාවක් වන මොරටුවේ හොරයිතුඩුවේ ෆාතිමා ජීර්වින් අබ්දුල් මාජිද් (31) එම නිවසේ උඩු මහලේ සිට බිමට පැනීමෙන් ඇතිවූ අස්ථී බිඳීමකින් රෝහල් ගතකර ඇති බව වාර්තා වේ.
සිද්ධිය පිළිබඳව හොයා බැලීමේදී හෙලිවූයේ මෙම කාන්තාව 2013.06.17 වැනි දින වැල්ලවත්ත එක්තරා විදේශ රැකියා ආයතනයකින් සෞදි අරාබියේ අබා ප්‍රදේශයේ නිවසක ගෘහ සේවිකාවක් ලෙස පැමිණ සිටින බවය. එම නිවසට පැමි‚ දිනයේ සිටම විවිධ ආකාරයේ හිංසනයන් කරන බව උදෑසන සිට රාත්‍රී 12 වනතුරුත් වැඩ කිරීමට සිදුවී ඇති බවත් නිවසේ හිමියන් නිවසෙන් බැහැරව යන අවස්ථාවලදී මෙම කාන්තාව කාමරයක දමා දොරගුලූ දමා යන බවත් කීය. එම කාලයේ කිසිදු අහරක් හෝ බීමට ජල බිදක් හෝ නොදන බවත් පිපාසය සැදුණු විට නාන කාමරයේ කරාම වලින් ජලය පානය කරන බවත් සමහර දිනවලදී දින දෙක තුනක කාලයක් නිවෙස් හිමියන් නොපැමිණෙන බවත් ඇය පවසයි. ඒ අතරම සුළු වැරදිමතදී පවා ගෙහිමි කාන්තාව පහර දෙන බවත් මේ සියල්ල ඉවසා සිටීමට නොහැකි තැන මා එම නිවසේ උඩු මහලේ සිට බිමට පැන්නේ මැරෙන්නට ම යැයි සිතා බවත් ඇය පවසන්නීය.
මේ වන විට මෙම කාන්තාව දින ගණනාවක් අබා අසීර් රජයේ රෝහලේ නේවාසිකව ප්‍රතිකාර කරන අතර ඇයගේ දකුණු පාදයේ බිඳී ඇති බව වෛද්‍යවරු පවසති. ශ්‍රී ලාංකික සමාජ සේවකයකු වන නිමල් එඩේරමුල්ල මහතාද ඇය බැලීමට මලීෂ් රෝහලට ගියේය.
මෙම කාන්තාවගේ තත්ත්වය බරපතළ නැති වුවත් මේ වන විට සුවය ලබා නැති බවත් දැනට දින 36ක් රෝහලේ නේවාසිකව ප්‍රතිකාර ලබන අතර තවත් මාසයක් පමණ කාලයක් ප්‍රතිකාර ගැනීමට සිදුවන බවත් වාර්තාවේ. මෙම කාන්තාවගේ තත්ත්වය පිළිබඳ දැනටමත් ජෙඩා පිහිටි කොන්සියුරේ කාර්යාල දැනුවත් කරන ඇති බවත් එඩේරමුල්ල මහතා පවසයි.
දුරකතනය හා සම්බන්ධ කරමින් මෙම කාන්තාව පැවැසුවේ මෙම අනාරක්ෂිත ස්ථානයෙන් වහාම ලංකාවට යාමට තමාට අවශ්‍ය බවයි.
