කොළොන්නාවේදී භාරත ලක්ෂ්මන් ප්‍රේමචන්ද්‍ර මහතා ඇතුළු සිව් දෙනෙකු මරා දැමූ සිද්ධියේදී වෙඩි වැදී තුවාල ලැබූ පාර්ලිමේන්තු මන්ත්‍රී දුමින්ද සිල්වාගේ හිස් කබලෙන් ඉවත් කළ කොටස් ඇත්නම් ඒ ගැන වාර්තාවක් ඉදිරිපත් කරන්නැයි කොළඹ ප්‍රධාන මහේස්ත්‍රාත් ප්‍රසන්න ද අල්විස් මහතා ශ්‍රී ජයවර්ධනපුර රෝහලේ විශේෂඥ වෛද්‍යවරියට නියෝග කළේය. එම වාර්තාව ලබන 20 වැනිදා ඉදිරිපත් කරන ලෙස ද නියම විය. මහේස්ත්‍රාත්වරයා එම නියෝගය දුන්නේ දුමින්ද සිල්වාට ශ්‍රී ජයවර්ධනපුර රෝහලේදී හිස් කබලට සිදු කළ සැත්කමින් හිස් කබලේ කොටස් ඉවත් කළ බවට ඔහුගේ ආරක්ෂකයා වූ ඇමැති ආරක්ෂක අංශයේ අනුර තුෂාර ද මැල් දුන් සාක්කිය සම්බන්ධයෙන් අනූජ ප්‍රේමරත්න නීතීඥවරයා කරුණු දැක්වූ අවස්ථාවේදී ය. නීතීඥවරයා කියා සිටියේ හිස් කබලෙන් ඉවත් කළ කොටස් ඇත්නම් එය නඩුවට වැදගත් වන බවයි.