(ටී.කේ.ජී.කපිල)

කටුනායක සිට ඕස්ට්‍රේලියාවේ සිඩ්නි නුවර බලා  අද අලුයම පියාසර කළ ශ්‍රී ලන්කන් ගුවන් යානයකට අකුණු පහරක් වැදීම හේතුවෙන් යළි  කටුනායකට ගොඩ බැස්සූ බව ගුවන් තොටුපොළ කාර්යය භාර නිලධාරීවරයා සදහන් කළේය . 

එම ගුවන් යානය , විනාඩි 40 ක ගුවන් ගමනකින් පසුව යළිත් කටුනායක ගුවන් තොටුපොළ වෙත ගොඩබැස්සවීමට එහි නියමුවා පියවර ගෙන ඇත. 

ශ්‍රී ලන්කන් ගුවන් සේවයේ යූ.එල්.- 606 දරන ගුවන් යානය  අද අලුයම 01.00 ට කටුනායක ගුවන් තොටුපොළෙන් ඕස්ට්‍රේලියාවේ සිඩ්නි නුවර බලා පිටත්ව ගොස් තිබුණි.

එම ගුවන් යානය එයාර් බස් වර්ගයේ ඒ.- 330 වර්ගයේ පුළුල් බද සහිත ගුවන් යානයක් වන අතර , එහි ගුවන් මගීන් 217 දෙනකු ඇතුළු ගුවන් යානා කාර්යය මණ්ඩලය 16 දෙනෙක් එහි ගමන් ගනිමින් කළහ.

ඒ වනවිට ප්‍රදේශයේ පැවති අකුණු ගැසීම් සහිත වැසි තත්වය මත මෙම ගුවන් යානයට ද අකුණු පහරක් එල්ල වී ඇත. ඒ සමග ගුවන් ගමන අතහැර ආපසු  විනාඩි 40 කට පසු  යළි කටුනායක ගුවන්තොටුපොළට ගොඩබැස්සවීමට ගුවන් නියමුවා පියවර ගත්තේය.

ඉන්පසුව වෙනත් ගුවන් යානයකින් පෙරවරු 06.06 ට කටුනායක ගුවන් තොටුපොළෙන් ඕස්ට්‍රේලියාවේ සිඩ්නි නුවර බලා පිටත් කර යැවූ බව ගුවන් තොටුපොළ කාර්යය භාර නිලධාරීවරයා වැඩිදුරටත් සදහන් කළේය .

අකුණු පහරට ලක් වූ ගුවන් යානය අලුත්වැඩියා කටයුතු සදහා කටුනායක ගුවන් තොටුපොළ , ශ්‍රී ලන්කන් ගුවන් අංගයන වෙත යොමු කර තිබේ .