ඉසුරු සොයා ඉතාලි සොයා ගිය ලාංකිකයන්ගෙන් ඇතැමෙක් අනවශ්ය දේට පැටැලී සිටිති. හිරේ විලංගුවේ වැටෙන තරමට මේ ගැටුම් දුර දිග ගොස් ඇත.ඇතැමෙක් හිරේ විලංගුවේය. ඇතැමෙක් නිවාස අඩස්සීයේය. මිල්ල (දැන් යුරෝ) උපයා සැපවත් ජිවිතයක් ගත කිරීමට ගොස් අමාරුවේ වැටී සිටින අය බොහෝ විට මේ තත්ත්වයට පත්ව සිටිනුයේ ශ්රී ලංකාවේම අය නිසාය.ඔවුන්ගේ බොරු පැමිණිලි නිසාය.තරහා කාරයා අමාරුවේ දැමීම සඳහා මාලයක් කඩා ගත්තාය, සල්ලි උඳුරාගත්තාය වැනි පැමිණිළි නිසා ඔවුහු අමාරුවේ වැටී සිටිති. මේ වෛරී පැමිණිලි නිසා ලංකාවේ පිරිසක් ඉබේම ඉතාලි පාතාලයට තල්ලු කරනු ලැබ සිටිති.
‘ඉතාලියේ මෙස්සිනා නගරයෙ දිනෙන් දින සිදු වන අපරාධ වැඩි වීමට හේතුව වන්නේ ගැටුමට මුල් වන පිරිස් හා ගැටුමට මැදි වු ශ්රී ලාංකික පිරිස් ගැටුමෙන් අනතුරුව පොලිසියට ගොස් මෙසේ පට්ටපල් බොරු කීම නිසාය. ‘
මෙස්සිනා එක්සත් ශ්රී ලංකා සංවිධානයේ සභාපති රොෂාන් රූපසිංහ මහතා එසේ කියයි.
2011 වර්ෂයේදී පැවැති එල්ලේ තරගාවලියකදී ඇති වු ගැටුමකින් පසුව කණ්ඩායම් දෙකක් අතර ඇති වු ගැටුමක් නිසා දිගින් දිගටම මෙවැනි ඛේදජනක සිදුවීමි ඇති වු බවත් මේ හේතුවෙන් ශ්රී ලාංකිකයින් පිළිබඳව වැරැදි ආකල්පයකින් ඉතාලි වැසියන් කටයුතු කිරීම නිසා ඉදිරියේදී ශ්රී ලාංකිකයන්ට රැකියා අවස්ථාව හෝ ලබා ගැනීමට නොහැකි තත්ත්වයක් උදා වනු ඇති ඔහු කියයි.
එසේම පසු ගිය දිනෙක ඉතාලියේ සිටින ලක් පාතාලයින් අත්අඩංගුවට ගත් බවට විවිධ මාධ්ය පළ වු ප්රවෘත්තියේ ද කිසිදු සත්යතාවක් නොමැති බවත් ඔවුන් අට දෙනාගෙන් හතර දෙනකුට පැහැර ගැනීමේ සිද්ධියකට අදාල නඩුවක් හැරුණු විට ඔවුන් අපරාධකරුවන් ලෙස කිසිදු පොලීසියකින් හෝ අධිකරණයකින් ඔප්පු වී නැති බවත්,සුළු සුළු වැරැදි සම්බන්ධයෙන් අත්අඩංගුට ගත් ඔවුන් වැරැදි කරුවන්ද නැද්ද යන්න පිළිබඳව ඉතාලි පොලීසිය වැඩි දුර පරීක්ෂණ සිදු කිරීමට මෙස්සිනා අධිකරණයේ සහාය පතා ඇතැයි ද ඔහු පවසයි.
එසේම ඉතාලියේ වෙසෙන කිසිදු ශ්රී ලාංකිකයකු ඉතාලි වැසියනට හානි වන අයුරින් කිසිදු ක්රියාවක් සිදු කර නැතැයිද ලාංකිකයන් අතරම විවිධ අවස්ථාවන් හි ඇති වන ගැටුම් නිසාත් මෙවැනි තත්ත්වයක් ඇතැයිද ඔහු සඳහන් කරයි.
‘ලාංකිකයින් වෙනුවෙන්ම මෙස්සිනා නගරයේ කතෝලික දේවස්ථානයක්,පන්සලක් හා පාසලක් ඉදි කැර තිබෙනවා .ඒ ඔවුන්ගේ යහපත උදෙසායි.ඔවුන්ට තියෙන ගැටළු නිරාකරණය කර ගන්න අපි එවැනි ස්ථානවල විශේෂ පහසුකමක් සලසා දී තිබෙනවා.ඒ වගේ තැන්වලට ඇවිත් ගැටළු නිරාකරණය කරගන්න.එහෙම වුනොත් පහුගිය කාලයේදී මෙස්සිනා නගරයේදී සිදු වු සියදිවි නසා ගැනීම් වැනි අවාසනාවන්ත දේ සිදු වන්නේ නැහැ.
මාසයක් වැනි කාලයකදී ලාංකිකයින් පස් දෙනකුම සිය දිවි නසා ගෙන තිබෙනවා.සිය දිවි නසා ගත් කෙනකුගේ සිරුර ලංකාවට එවන නිසා ඔවුන් සිය දිවි නසා ගන්නවාද දන්නේ නෑ.සිය දිවි නසා ගන්න අයගේ සිරුරු මින් පසු ලංකාවට එවන්නේ නෑ. සිරුරක් එවන්න රුපියල් ලක්ෂ හතරකට පහකට වැඩිය යනවා.
ඒ වගේම මෙස්සිනා එක්සත් ශ්රී ලංකා සංවිධානයේ සභාපති වශයෙන් මා ඉල්ලා සිටිනවා මෙස්සිනා හි සිදු වන ඕනෑම දෙයක් පිළිබඳව නිවැරැදි තොරතුරක් ලබා ගැනීමට නම් අපෙන් අහන්න.නිවැරදි තොරතුරු දෙන්න අපි සුදානමින් ඉන්නවා.එහෙම නැතිව අසත්ය පුවත් පළ කරන්නවත් ප්රචාර ගෙන යන්නවත් එපා. ශ්රී ලාංකිකයන් විදියට අපි දැඩි අපහසුතාවට පත් වෙනවා .ඒ වගේම අපරාධකරුවා ලෙස සැක කරන පුද්ගලයාගේ පවුලේ පිරිස් දැඩි ලෙස අසරණ වෙනවා.’
[email protected] විද්යුත් ලිපිනය මෙස්සිනා එක්සත් ශ්රී ලංකා සංවිධානය ඇමැතිය හැක.
