(තිහගොඩ - උපසේන ලියනගම)
පියා සහ දියණිය එක කුස ඉපදීම පිළිබඳ මේ අපූරු පුවත පසුගියදා අසන්නට ලැබුණේ දකුණු පළාතේ නීතිඥ කාර්යාලයකිනි.
සිව්දරු පියකු වූ ඔහුගේ බිරිඳ කලකට පෙර පෙනහලු පිළිකාවකින් මියගොස් තිබූ අතර ලොකු දරුවන් තිදෙනාම රැකියා ලැබ විවාහ වී ඈත පළාත්වල ජීවත් වූහ.
පවුලේ බාල දියණියට ද විවාහ යෝජනා ආවත් මේ වනවිට පියා හෘදයාබාධයකට ලක්ව සිටීම නිසා ඔහු හැර නොගියත් ප්‍රදේශයේම තරුණයකු බින්න විවාහයකට එකඟ වී ඇය විවාහ කරගෙන පියාගේ දුක සැප බැලුවේ සතුටෙනි.
පසුගිය ද‌ා වෛද්‍ය ප්‍රතිකාර ගැනීම සඳහා බෑනාගේ ත්‍රිරෝද රථයෙන් දියණිය සමඟ යන විට පියා කීවේ “මගේ දේපොළ ඔක්කෝම පොඩි දුවට අන්තිම කැමති පත්‍රයකින් අදම ලියන්න ඕන” කියාය.
ඊට පොඩි දුව කැමති නොවූවත් සිය සැමියා ඊට එකඟ වීම නිසා ප්‍රතිකාර ගත් පසු නීතිඥ කාර්යාලයකට ගියේ ඔප්පු ලිවීමටය. “ලොකු උන්නැහැගේ අකුරෙන්ම ඒක ලියලා දෙන්න.” නීතිඥවරයා කී පසු ඔහු වෙව්ලන අතින් එය ලියා ඔහුට දුන් පසු නීතිඥවරයාට හිනා ගියේය.
එහි ලියා තිබුණේ “මගේ එක කුස උපන් දියණියට” කියාය.
එදෙස බැලූ පියා “ආදරේ වැඩිකමට එහෙම ලියවෙන්න ඇති. ඒක හරිගස්සන්න” කියා සිනාසුනත් පොඩි දුවගේ දෙනෙත්වල කඳුළු පිරී තිබුණාලු.
