(වියලු‍ව වාර්තාකරු)
හොර ගමනක් ගොස් ගම්මුන්ට මාට්ටු වී මහ රෑ මැදියමේ කුඹුරු යායකට දියවර සපයන ඇළකට බැස දිය නෑ බව කියන පුද්ගලයකු පිළිබඳ පුවතකි.
සිද්ධිය මෙසේය.
ඔහු ගමේ කාන්තාවක සමඟ අනියම් සබඳතාවක් පවත්වාගෙන ගිය පුද්ගලයකි.
පසුගිය දිනක ඇගේ සැමියා නැති වෙලාවක් බලා ඔහු මැදියම් රැයේ ඇගේ නිවසට ඇතුළු වූයේ තහනම් ගෙඩි කඩන්නට ය.
ඔහු එහි සිටින බව දැනගත් ගමේ පිරිසක් නිවෙස දෙසට පැමිණෙන්නට වූයේ ඔහු අල්ලාගෙන කාන්තාවටත් ඔහුටත් අපූරු පාඩමක් උගන්වන්නටය.
එහෙත් ලද සුළු ඉඩකඩකින් පස්සා දොරෙන් පැන ගත් ඔහු මහ කරුවලේම කැලෑ බඩවැටි ඔස්සේ දිව යන්නට වූයේ විදුලි පන්දම් දල්වාගෙන පසුපසින් පැමිණි පිරිසට හසු නොවන පරිද්දෙනි.
පණ බයේ දිවගිය ඔහු මද දුරක් යද්දී ගමේ කෙත් යායට ජලය සපයන ඇළ මාර්ගයට ඇද වැටුණේ ඔහුටත් නොදැනීමය.
විදුලි පන්දම් රැගෙන පසුපසින් පැමිණි පිරිසගෙන් ගැලවිල්ලක් අත් නොවන බව දුටු හෙතෙම කිසිවක් සිදු නොවූ පරිද්දෙන් තමුන් වැටුනු ඇළ මාර්ගයේ ද දිය බුං ගසමින් මහ රෑ මැදියමේ දිය නාන්නට වූයේ කිසිවක් සිදු නොවූ පරිද්දෙනි.
ඔහු අසලටම පැමිණි ගමේ පිරිස ‘මොකද මේ මහ රෑ නාන්නේ‘‘ යැයි පවසද්දී’ පොඩි වැඩක් තිබ්බා දැන් තමයි ඉවර වුණේ වතුර ටිකක් නාගන්නවා, යැයි ඔහු ඇඟට පතට නොදැනී කියා සිටියේ පසුපසින් තමුන් එළවාගෙන ආ පිරිස නිරුත්තර කරමිනි.
