වයඹ පළාතේ ගමකින් මෙම සිදුවීම වාර්තා විය.
කුලී වැඩ ජීවිකාව කරගත් 67 හැවිරිදි ඔහු කරන්නේ කරත්ත රස්සාවය.
සිය කරත්තය රැගෙන දවසේ කුලියක් මලියක් කරගන්නා මොහු උදේම නිවසින් පිටත් වී හැන්දෑවට නිවසට එන්නේ හතර ගාතයනි.
උදේ සිට රෑ වනතුරු කාගේ හෝ වැඩ කර අඩියක් ගැසීම ඔහුගේ පුරුද්දකි. වැඩ කරන තැනින් හෝ ලැබෙන කසිප්පු බීමත් මුදලට හෝ රැගෙන බීමත් ඔහුගෙ දින චර්යාවයි. ඉන් පසු පියවි සිහියක් නැති ඔහු ගෙදර ආවේ කෙසේදැයි නොදනී.
වෙරි වැටෙන ඔහු ඔසවා කරත්තයට දාන්නේ ඔහු සමග වැඩ කරන අයකි. ඉන් පසුව කරත්තය බැඳි ගොනා ඔහු නිවසටම රැගෙන එයි.
නිවැරදිව පාරේ වම් පසින් එන ගොනා හතර ගාතෙ දමා කරත්තෙ ගෙන එන ඔහු ගෙදරට පැමිණ කරත්තය සිටවා බලා සිටී. බිරිය පැමිණ කරත්තෙන් ඇද සැමියා ගෙට ගනී. ඉන්පසු බිරිය සැමියාගෙ කමීස සාක්කුවට අත දමා මුදල් ඇතිද බලා නැති බව දැක මේ මනුස්සයා නම් හැදෙන්නේ නෑ අදත් සල්ලි ටික බීල ඉවර කරලා කියමින් දෙස් දෙවොල් තබමින් සිටී.
මෙසේ හතර ගාතෙන් එන සැමියාට දිනපතා දෙහි කැපීම බිරියගේ පුරුද්දකි.
දිනක් සැමියාගේ බීමතින් එන පුරුද්ද නවතා දැමීමට බිරිය උපායක් කල්පනා කළාය. සැමියා ගෙදර ආවට පසු බිරිඳ කරත්තයෙන් ගොනා ලෙහා මඩුවේ ගැට ගසා කරත්තයේ ‘‘කඩ ඇණය” ගලවා දැමුවාය.
පසු දින කිසිවක් නොදත් ඔහු වැඩට යාමට ගොනා ගෙනැවිත් කරත්තයේ බැන්දේය.
ඉන් පසු කරත්තයට නැගුණු ඔහු හා...... යමන් පුතා කියා ගොනාට තට්ටුවක් දමනවාත් එක්ක ගොනා ඉදිරියට ගියේය. දඩස් ගා කරත්ත රෝදය ගලවා ගෙන ඔහු බිමට පතිත විය. ඔහු මරළතෝනි දෙන්නට විය.
ඔහුගේ උරපත්ත බිඳී මාස දෙකක් තෙල් බඳින්නට වූයේ බිරියටය.
ඉන් පසු ඔහු හතර ගාතෙන් ගෙදර ආවේ නැතිලු.
නැදලගමුව - ආර්.ඒ. ප්‍රියංකා රූපසිංහ
