(මොරගොල්ලාගම සිසිර කැලේගම)
ආයතන ප්‍රධානියකු සේවා ස්ථානය වෙත පැමිණ තමා පැළඳගෙන සිටි මුඛ ආවරණය ආයතනයේ තබා සේවිකාවකගේ මුඛ ආවරණයක් දමාගෙන ආයතනයෙන් නික්ම යාමේ පුවතක් රජරට පුරවරයෙන් අසන්නට ලැබුණි.
සිද්ධිය මෙසේය.
කොරෝනා තත්ත්වය හමුවේ පැවැති ඇඳිරි නීතිය ඉවත් කර සාමාන්‍ය පරිදි වැඩ කටයුතු පවත්වාගෙන යෑමේ දොරගුළු ඉකුත් 11 වැනිදා විවර විය.
ඒ අනුව මෙම රාජ්‍ය ආයතනයට පැමිණි ආයතන ප්‍රධානියා සෞඛ්‍ය විධි අනුගමනය කරමින් සමාජ දුරස්ථභාවය තබාගෙන තම සේවකයන්ට කටයුතු කරන්නට උපදෙස් දී තිබුණි.
එලෙස පැමිණි නිලධාරීන් හා ලිපිකාරිනියන් කිහිප දෙනකු සමග ආයතනයේ ප්‍රධානියා ද කාර්යාලයේ රැඳී කටයුතු කළ අතර, අන් සේවක සේවිකාවෝ යාබද කාමරවල සේවය කළහ.
ඔහු දුර බැහැර සිට පැමිණෙන්නකු බැවින් අන් අය සේවා ස්ථානයේ රැඳී සිටියදීම ඔහු ආයතනයෙන් නික්ම ගියේය.
ඔහු ගිය පසුව අන් අය ද සේවා ස්ථානයෙන් නික්ම යාමට සැරසෙන අවස්ථාවේදී එහි සේවිකාවකගේ මුඛ ආවරණය නොමැති බව පවසා අන් අය හා එක්ව එය සොයන්නට විය.
ආයතන ප්‍රධානියාගේ පුටුව අසල මුඛ ආවරණයක් ඇතත්, එය ඇයගේ නොවන බව ඇය කියයි.
ඇය ආයතනය පවිත්‍ර කර ඇයගේ මුඛ ආවරණය ඉදිරියේ කාමරය අසල වේළෙන්නට තැබූ බවත්, ආයතන ප්‍රධානියා එකී ටැප් එක අසලට ගොස් මුහුණ කට සෝදාගෙන පසුව ඒ අසල තිබූ මුඛ ආවරණය දමාගෙන නික්ම ගොස් ඇති බවත් පසුව අනාවරණය විය.
ඒ ගැන විමසීමේදී එකම හැඩයෙන් යුත් මුඛ ආවරණ නිසා මෙම අකරතැබ්බය සිදුවී ඇති බවත්, සිද්ධිය අන් නිලධාරීන් දැනුම්දීමත් සමගම ප්‍රධානියා වහ වහා පාමසියක් වෙත ගොස් අලුතින් මුඛ ආවරණයක් මිලදී ගෙන පැළඳ සිටි මුඛ ආවරණය ඉවත් කර ඇති නමුත්, සේවිකාව කිසි දෙයක් කර කියා ගත නොහැකිව අන්ත අසරණ වූ බවත් දැන ගන්නට ලැබුණි.
