(වියලු‍ව වාර්තාකරු)
ආබාධිත පිරිමි හා කාන්තා රෝගීන් දෙදෙනකු රැක බලාගැනීම සඳහා රෝහලක යාබද වාට්ටු දෙකක රැඳී සිටි තරුණියක හා තරුණයකු හාද වී තමුන්ගේ රෝගීන්ට උපස්ථාන කිරීම පසෙක තබා දිවා කල රෝන්දේ ගිය බව කියැවෙන පුවතකි.
සිද්ධිය මෙසේය.
එය එක්තරා රජයේ රෝහලකි.
එකිනෙකට යාබදව තිබූ වාට්ටු දෙකක ප්‍රතිකාර ලැබුවේ ආබාධිත තත්ත්වයට පත්වූ කාන්තාවන් හා පිරිමි පුද්ගලයින්ය. යාබදව වාට්ටු දෙක පැවැතීම නිසාත්, කලක් තිස්සේ වාට්ටුවල රැඳී සිටීම නිසාත් රෝගීන් රැක බලාගන්නා උදවිය නිතර මුණගැසුණු අතර, ඔවුන් අතර ඇතැම්විට මිතුරු දම් ද දලුලා වැඩෙන්නට වීම අරුමයක් නොවීය..
මේ අතර ගම්බද ප්‍රදේශයෙන් පැමිණ තම ආබාධිත සහෝදරයා රැක බලාගත් තරුණයකු යාබද වාට්ටුවේ සිටි කාන්තා රෝගියකු රැක බලාගත් තරුණියක සමග ඇයි හොඳයිකම් පවත්වන්නට පටන් ගත්තේ සීමාව ද ඉක්මවා යමිනි.
හිතවත්කම ප්‍රේමයට හරවාගත් දෙපළගේ ආදර පලහිලව්ව වාට්ටුවල උදවිය පවා දැන ගත්තේ ඔවුන්ගේ හැසිරීම් නිසාය.
කලින් කතිකා කරගත් පරිදි පසුගිය දිනක ඔවුන් රෝගී සාත්තුව පසෙකලා රෝහලින් පිටව වෙනත් ස්ථානයක් කරා පිටව ගොස් ඇත්තේ සිත් සේ පෙම් සුව විඳීමේ අටියෙනි. දිවා කල හතර දිග්භාගයේ ඇවිද යමින් රිසි සේ පෙම් සුව විඳි ඔවුන් රෝහලට පැමිණෙන විට සවස් වී තිබිණී.
තරුණයාගේත් තරුණියගේත් සබඳතාව ගැන හොඳ හැටි දන්නා වාට්ටුවේ සිටි සෙසු රෝගීන් බලාගන්නා පිරිස ඔවුන් දෙපළගේ රෝගීන්ට ද අඩුවක් නැතිව සලකා තිබීම නිසා කිසිදු ගැටලුවක් මතු නොවූවත් තරුණයාගේත් තරුණියගේත් ඥාතීන්ගෙන් නම් ඔවුන්ට ගැලවුමක් නොවිණි.
