හක්මණ විශේෂ - දෙනගම යසන්ත ආරියසේන
රුපියල් ලක්ෂ තුනක් පමණ වටිනා නවීන පන්නයේ දුරකතනයක් මිලදී ගැනීමට රුපියල් ලක්ෂ විසි හතරක් පමණ වැය කළ පුද්ගලයකු පිළිබඳ අපූරු කතාවක් දකුණු පළාතේ එක්තරා ප්‍රදේශයකින් වාර්තාවේ.
රජයේ සේවකයකු වන ඔහු යහපත් ජීවිතයක් ගෙවමින් සිටි අතමිට සරු අයෙකි. සුහුරු මාදිලියේ දුරකතනයක් තමන් සතුව තිබුණද අති නවීන පන්නයේ සුහුරු දුරකතනයක් මිලදී ගැනීමේ දැඩි ආශාවක් ඔහුට ඇති විය.
ඒ සඳහා කිසිවකුගේ උපකාර ලබා ගැනීමට ඇති අකැමැත්ත නිසාම ඔහු ඒ සඳහා ක්‍රමයක් දස අතේ කල්පනා කළේය. දුරකතන අලෙවි කිරීම පිළිබඳව අන්තර්ජාලයේ පළකර තිබූ වෙළෙඳ දැන්වීමක් දුටු ඔහුගේ සිත සතුටින් ඉපිල ගියේය. නවීන දුරකතන නාමාවලියේ සඳහන් අලු‍ත්ම දුරකතනයක් ඔහුගේ සිත්ගත් අතර එය ඇණවුම් කළේය.
ඇණවුම් කළ දුරකතනය සඳහා ගෙවිය යුතු මුදල සඳහන් පණිවිඩයක් පෙරළා පැමිණි අතර, එහි සඳහන් මුදල සිය බැංකු ගිණුම හරහා පණිවුඩයේ සඳහන් ගිණුමට බැර කළේය. දින කිහිපයකින් තවත් මුදල් ප්‍රමාණයක් සඳහන් කරමින් ලද පණිවිඩය අනුව එම මුදලද ගෙවා දැමීය.
රුපියල් ලක්ෂ තුනක් පමණ වටිනා දුරකතනය සඳහා නොයෙක් අවස්ථාවලදී විවිධ හේතු පවසමින් මුදල් බැර කරන ලෙස ලැබෙන පණිවිඩයට අනුව රුපියල් ලක්ෂ විසි හතරක් පමණ බැර කළ පසු තමන් වංචාවකට හසුව ඇති බව තේරුම් යන විට ඔහු ප්‍රමාද වී හමාරය.
දුරකතනයක් මිලදී ගැනීමට යාමේදී මුදල් වංචාවක් කළ බව පොලිස් පොතේ පැමිණිල්ලක් සටහන් කළද, ඒ වන විට මුදල් සහ දුරකතනය යන දෙකම ඔහුට අහිමි වී තිබුණි. අන්තර්ජාලය ඔස්සේ විවිධ පුද්ගලයින් සිදුකරන වංචාවකට පැමිණිලිකරු හසුව ඇති බව අනාවරණය කරගත් පරීක්ෂණ නිලධාරීහු ද ගැටලු‍ව විසඳාගත නොහැකිව පඹගාලක පැටලී සිටියහ.
