කොළඹ ජනාකීර්ණ නගරයක ප්‍රධාන මාර්ගයක සවස්වරුවේ දැඩි රථවාහන තදබදයක් හසුරවමින් සිටි රථවාහන පොලිස් කොස්තාපල් දැක කලබල වූ තරුණ යතුරුපැදිකරුවකුට උතුර දකුණ මාරුවී මාර්ගයේ විරුද්ධ දිසාවට ධාවනය කරනු දක්නට ලැබිණි. ඔහු අල්ලා ගැනීමට පොලිස් නිලධාරියා දුව යනවිට යතුරුපැදිකරු තම පැදියද මහමග දමා දුවන්නට විය. පුද්ගලයකු පසුපස පොලිස් නිලධාරියකු ලුහුබඳිනු දුටු මාර්ගයේ ගමන් ගත් ජනතාවද පොලිස් නිලධාරියා පසුපස දුවන්න වූහ.
කිලෝමීටරයක් පමණ දුව ගොස් අල්ලා ගත් යතුරුපැදිකරු ‘අනේ මට ගහන්න එපා බුදු සර්’ කියන විටත් ජනතාව ඔහුට බඩ පිරෙන්න ගුටි බැට දී හමාරයි. තමන් දැක යතුරුපැදියද දමා පැන යාමට හේතු විමසූ පොලිස් නිලධාරියාට තරුණ යතුරුපැදි පවසා සිටියේ ‘සර් යාළුවන් සමග හවස බියර් බෝතලයක් බිව්වා. සර්ව දැක්කාම බය හිතුනා. ඒකයි දිව්වේ’ යනුවෙනි.
වැල්ලවත්ත බී. ජානක
