හක්මන විශේෂ – දෙනගම යසන්ත ආරියසේන
නගරයේ ප්‍රසිද්ධ ස්ථානයක පැවැත්වෙන විශේෂ භාවනා වැඩසටහනකට යනවා යැයි රාජකාරී දිනක කාර්යාලයෙන් බැහැරව ගොස් මිතුරන් පිරිසක් සමග ප්‍රසිද්ධ ස්ථානයක තබාගෙන මධුවිතෙන් සප්පායම් වී පුද්ගලයකු සමග ආරවුලක් ඇති කරගත් සේවකයෙකුට ආයතන ප්‍රධානියා විසින් විනය ක්‍රියාමාර්ග ගත් කතා පුවතක් දකුණු පළාතෙන් වාර්තාවේ.
මහජනතාවට සේවය නිරන්තරයෙන් සිදුකරන ජනතාව අතර දැඩි ප්‍රසාදයට පත් රජයේ කාර්යාලයක්, ග්‍රාමීය කඳුකර ප්‍රදේශයක විය. වසර කිහිපයකට පෙර ස්ථාන මාරුවීමක් ලැබ සේවකයෙක් එම කාර්යාලයට පැමිණියේය. සේවයට වාර්තා කළ දිනවල සිට විවිධ සේවා අවශ්‍යතා සඳහා යැයි බැහැර යෑම ඔහු පුරුද්දක් කරගෙන සිටියේය.
වෙසක් පොහොය දිනයට සමගාමීව භාවනා වැඩසටහනක් නගරයේ ශාලාවක සංවිධානය කර තිබුණි. භාවනා වැඩසටහනට සහභාගී වීමට යැයි ප්‍රධානියාට දන්වා බැහැර රාජකාරි වාර්තා කර, බැහැරට ගිය ඔහු මිතුරන් පිරිසක් සමග එක්ව මත්පැන් සාදයක් පැවැත්වීය.
ප්‍රධාන මාර්ගයක් අසල නිස්කලංක සුන්දර ස්ථානයක සාදය පැවැති අතර එම ස්ථානයෙන් ගමන් කිරීමට පැමිණි පුද්ගලයකු, මෙම සේවකයා සමග ආරවුලක් ඇති කරගෙන තිබේ.
සේවකයා පිළිබඳව හඳුනාගත්, ආරවුලට මුහුණ දුන් පුද්ගලයා එම අවස්ථාව රූපගත කරගත්තේය. සේවකයා සේවය කරන ආයතනයට එම පටිගත කිරීම ලැබීමට සලස්වා පැමිණිල්ලක්ද කළේය. පුද්ගලයකුගෙන් ලද පැමිණිල්ලට අනුව ආයතන ප්‍රධානියා විමර්ශනය පැවැත් වූ අතර විමර්ශන නිලධාරීන්ගේ ප්‍රශ්න කිරීම්වලදී සේවකයා නිරුත්තර වූයේය.
ආරවුලට මුහුණ දුන් පුද්ගලයාගෙන් සේවකයා සමාව අයැද සිටි අතර ආයතන ප්‍රධානියාගේ නිර්දේශ මත එම සේවකයාට දැඩි විනය ක්‍රියාමාර්ග ගෙන ඇති බව වාර්තා වේ.
ඔහු සිද්ධිය වසන් කර ගැනීමට කොතෙකුත් උත්සාහ කළද වෙසක් පොහොය දින කාර්යාලයේ ආගමික වැඩසටහනේදී ආයතන ප්‍රධානියා කළ ලු‍ණු ඇඹුල් සහිත දේශනාවත් සමග සිද්ධිය ලැව් ගින්නක් සේ කාර්යාලය පුරාපැතිර ගියේය. භාවනා වැඩසටහන කොහොමද යනුවෙන් කාර්යාල මිතුරු මිතුරියන් විමසීම නිසා සිය දුරකථනයද විසන්ධි කර තැබීමට ඔහු කටයුතු කර ඇති බව සැලවේ.
