පෝද්දල සරත් ආනන්ද ගමගේ
කිසිවකුත් ගෙන නොයන අපූරු තෑග්ගක් බණ ගෙදරකට ගෙනගිය පුද්ගලයකු පිළිබඳ අමුතුම කතාවක් දකුණු පළාතේ ප්‍රසිද්ධ නගරයකින් පසුගියදා අසන්නට ලැබුණි.
පිරිමි දරුවන් තිදෙනකු හා දියණියකගේ තාත්තා කෙනෙකුගේ තුන් මාසයේ දානමය පින්කම පසුගියදා පැවැත්වුණේ බාල පුත්‍රයාගේ නිවසේය. ඔහුගේ නිවස ආසන්නයේම තවත් සහෝදරයෙක්ද පදිංචිව සිටී.
ඔවුන්ගේ වැඩිමල් සහෝදරයා රජයේ ඉහළම තනතුරක් හොබවන අයෙකු ළඟ සේවය කිරීම නිසා ඉතා අලංකාරවත් ලෙස මෙම පින්කම් සංවිධානය කෙරුණු අතර ඒ සඳහා විශාල පිරිසක්ද සහභාගි වූහ.
මෙම පියාගේ හත් දවසේ පින්කම පැවති දින පැමිණි කෙනෙකු විසින් ඉවත දමන ලදදෑ ඇතුළත් පාර්සලයක් ලබාදී ඇත. එය ලබාදුන්නේ අසල්වැසියෙකැයි ඔවුන්ට සැකයක්ද ඇතිවී ඇත.
තුන් මාසයේ දානයට පෙර බණ පැවති දිනයේ අර සැකකටයුතු පුද්ගලයා පැමිණිය හොත් ඔහුගේ පාර්සලය පරීක්ෂා කිරීමට සහෝදරයෝ එකඟතාවකට පැමිණ සිටියහ.
බණ දේශනා කරන අවස්ථාව ළංවෙමින් තිබියදී පැමිණෙන පිරිස අතර අර පුද්ගලයාද පැමිණ යහමින් බරට ඇති පාර්සලයක් ගෙහිමියාට පරිත්‍යාග කළේය. ගෙහිමියා එය ස්තුති පූර්වකව බාරගෙන ඔහුට අසුන් ගන්නට යැයි කියමින් පාර්සලය ඔබා බලා ඇත.
මහත් රළු දෙයක් එහි ඇති බව දැනගත් ඔහු පාර්සලය විවර කර කඩදාසි ආවරණයේ කොනකින් ඉරා ඒ මොනවාදැයි බලනවිට ඔහුට ගඩොල් කැට දෙකක් දැක ගැනීමට ලැබී ඇත. එයත් රැගෙන පාර්සලය ගෙනා පුද්ගලයා ළඟට ගිය ඔහු “බණ අහල කෑම ටිකක් කාල යන්න. මේ තෑගි නම් ඕන නෑ අයියෙ” කියමින් එය රැගෙන ආ පුද්ගලයාටම බාරදී ඇත.
සිද්ධිය දුටු අයගේ උසුළු විසුළු හා සිනාහඬ මැද්දේ පාර්සලය ගෙනා පුද්ගලයා හෙමිහිට මාරුවී ගොස් ඇත. බණ සඳහා වැඩම කළ නාහිමියන්ද සිය අනුශාසනාව සඳහා ගඩොල් පාර්සලය තේමා කරගැනීම නිසා එහි පැමිණ සිටි සියලු පිරිසට සිද්ධිය දැනගැනීමට ලැබී ඇත.
ගඩොල් පාර්සලය තෑගි කළ පුද්ගලයා මෙතෙක් සමාජයේ කාටවත් මුණගැසී නැතැයි ද වාර්තා වේ.
