(කෑගල්ල අධිකරණ චමින්ද වැවතැන්න)
නිවෙස ඉදිරිපිට මිදුලේ තනා ඇති බුදු මැදුරේ පහන පත්තු කිරීමට ලේලිය පොල් තෙල් ගෙනත් නොදුන්නා යැයි පවසා වයෝවෘද්ධ කාන්තාවක බුදු මැදුර ඉදිරිපිට යකා නටා ඇතැයි කියන පුවතක් කෑගල්ල ප්‍රදේශයේ ග්‍රාමයකින් වාර්තාවේ.
වාර්තා වන අන්දමට සිද්ධිය මෙසේය.
කෑගල්ල ප්‍රදේශයේ ග්‍රාමයක 73 හැවිරිදි වයෝවෘද්ධ සිවුදරු මවක් තෙවැනි පිරිමි දරුවාගේ නිවසේ පදිංචිව සිටින්නීය. මෙම සිවු දරු මවගේ වැඩිමල් පිරිමි දරුවා පොලොන්නරුව ප්‍රදේශයේ පදිංචිව සිටියි. දෙවැනි ගැහැනු දරුවා ගම්පොළ ප්‍රදේශයේ පුද්ගලයෙක් සමග විවාහ වී ගම්පොළ පදිංචිව සිටින්නීය. තෙවැනි පිරිමි දරුවා ඔහුගේ බිරිය දරුවන් දෙදෙනා සමග වයෝවෘද්ධ කාන්තාව කෑගල්ලේ මහගෙදර නිවසේ පදිංචිව සිටියි. බාල ගැහැනු දරුවා වරකාපොළ, අඹේපුස්ස ප්‍රදේශයේ පුද්ගලයකු සමග විවාහ වී එකී නිවසේ පදිංචිව සිටින්නීය.
මෙම දෙදරු පියා මීට වසර 4කට පමණ ඉහතදී සෞදි රාජ්‍යයේ රැකියාවකට ගියේය.
ඔහු විදේශ ගතවන අවස්ථාවේ දී බිරිඳට කියා සිටියේ සිය වයෝවෘද්ධ මවගේ අවශ්‍යතා සපුරාලමින් දරු දෙදෙනා ද රැක බලා හදාගෙන ජීවත් වන ලෙසය.
වයෝවෘද්ධ කාන්තාව ලේලිය හා දරුවන් දෙදෙනා සමග ජීවත් වෙමින් සිටින අවස්ථාවේ දී සෞදි රාජ්‍යයේ සේවය කරන පුතා දිනකට හෝ දෙකකට වරක් ස්කයිප් මාර්ගයෙන් නිවසේ පදිංචි සියලු දෙනා සමග කතා බහ කොට විශේෂයෙන්ම මවගේ ද සුව දුක් ද විමසීය. එහිදී විදුලි කාර්මික ශිල්පී දෙදරු පියා මුදල් එවූ සෑම අවස්ථාවකදීම බිරිඳට නිතරම කියා සිටින්නේ සිය මවගේ අවශ්‍යතා සොයා බලා නොපිරිහෙලා ඉටු කර දෙන ලෙසය.
නිවස ඉදි කරන අවදියේ දී මවගේ බලවත් ඉල්ලීමට නිවෙස ඉදිරිපිට අලංකාර බුදු මැදුරක් තනා දී තිබුණි. මෙම බුදු මැදුරට සෑම දිනකම සවස 6ට වයෝවෘද්ධ කාන්තාව මල්පහන් පූජා කරන්නීය.
ඉකුත් දිනක සවස වයෝවෘද්ධ කාන්තාව ලේලියට කියා ඇත්තේ ‘‘අදට පහන පත්තු කරන්න පොල් තෙල් තියෙනවා හෙට පහන පත්තු කරන්න පොල් තෙල් නෑ. පොල් තෙල් ටිකක් හෙට ගෙනත් දෙන ලෙසයි. පසු දා උදේ ද කීප අවස්ථාවකදීම පොල් තෙල් ටිකක් ගෙනත් දෙන්න යැයි ලේලියගෙන් ඉල්ලීම් කර ඇති බවත් වාර්තා වෙයි. කෙසේ වෙතත් සවස හය පහු වෙනකම්ම නිවසේ තිබුණු වැඩ නිසා පොල් තෙල් ටිකක් ගෙනත් දෙන්නට ලේලියට නොහැකි විය.
මෙම මහලු මව මල් වට්ටියක් කඩාගෙන බුදු මැදුරට මල් පූජා කරන්න ගිය අවස්ථාවේ දී පොල් තෙල් ගෙනත් නොදුන්නා යැයි දොස් පවරා මල් වට්ටිය පූජා කර ලේලියට බැණ වදිමින් බුදු මැදුර ඉදිරිපිට අසල්වැසියන්ටත් ඇසෙන්නට යකා නටා ඇතැයි වාර්තා වේ.
