කොත්මලේ - සුදත් එස්. කුමාරසිරි
තමන් රුපියල් 180 කට මිලදී ගත් පෙතිපාන් ගෙඩිය, කල් ඉකුත්වීමට පෙර රුපියල් 250 ක් ගෙවා ත්‍රීරෝද රථයකින්, රාත්‍රී 12.00 ට පෙර නිවසට රැගෙන ගිය පුද්ගලයකු පිළිබඳ පුවතක් පසුගියදා කොත්මලේ ප්‍රදේශයේ එක්තරා ගම්මානයකින් වාර්තා විය.
දැනගන්නට ඇති පරිදි සිද්ධිය සැකෙවින් මෙසේය.
ඔහු කොත්මලේ ප්‍රදේශයේ ජීවත්ව සිටින දෙදරු පියෙකි. ඔහු නිතරම වාගේ මත්පැන් පානයට ඇබ්බැහිවී සිටින අයෙකි. පසුගිය දිනක ඔහු නගරයට යාමට සූදානම් වූ අවස්ථාවක ඔහුගේ බිරිය පවසා ඇත්තේ, පසුදින දියණියට පාසලට රැගෙන යාම සඳහා පෙතිපාන් ගෙඩියක් රැගෙන එන ලෙසටය.
බිරියගේ එම ඉල්ලීමට අවනත වූ ඔහු මුලින්ම රා තැබෑරුමකට ගොස් රා පානය කොට, හොඳට පදම් වීමෙන් පසුව අදාළ නගරයට ගොස් පෙතිපාන් ගෙඩියක් රුපියල් 180 ක් ගෙවා මිලදී ගෙන ඇත.
එහිදී වෙළෙඳසලේ මුදලාලි පවසා ඇත්තේ පෙතිපාන් ගෙඩිය පසුදින කල් ඉකුත් වන බවය. ඒකට කමක් නැහැ මුදලාලි මම රාත්‍රී 12.00 ට පෙර ගෙදර යන්නම් කියා ඔහු වෙළඳසලෙන් පිටව ගොස් ඇත.
තරමක් පදම් වී සිටි නිසා, රාත්‍රී 11.20 පමණ වන තුරුත් නගරයේ රැදී සිටියේ ඔහු තවත් කිහිපදෙනෙකු සමග දේශපාලන කතාවකට එක්වෙමිනි. එහිදී එක්වරම පෙතිපාන් ගෙඩිය ගැන මතක්වූ ඔහු මට රාත්‍රී 12.00 ට පෙර නිවසට යා යුතු යැයි පවසා රුපියල් 250 ක් ගෙවා ත්‍රීරෝද රථයකින් තම නිවසට ගියේ පෙතිපාන් ගෙඩිය කල් ඉකුත් වීමට පෙරය.
එලෙස රාත්‍රී 11.50 වනවිට පෙතිපාන් ගෙඩිය ඔහු නිවසට රැගෙන ගියත්, පසුදා උදෑසන පෙතිපාන් ගෙඩිය පරීක්ෂා කිරීමේදී බිරිය දැක ඇත්තේ පෙතිපාන් ගෙඩිය කල් ඉකුත් වී ඇති බව ය.
