(මොරගොල්ලාගම සිසිර කැලේගම)
ප්‍රේත ආත්මයක් වැලඳී තිබුණු තරුණයකුගේ ප්‍රේම ආත්මය ඉවත් කිරීමට ගොස් ප්‍රේතයා පහරදීමෙන් සාත්තුවට පැමිණි කට්ටඩියා රෝහල් ගත කිරීමේ පුවතක් ඇතුගල්පුර අවට ප්‍රසිද්ධියක් උසුලන උප නගරයකින් වාර්තා වේ.
අනාවරණය වන ආකාරයට සිද්ධිය මෙසේය.
ගැමි පෙදෙසක නිවහනක වාසය කරන ඔවුහු නිතර නිතර රෝගා බාධවලට ලක්වෙති. රෝහල කරා ගොස් ප්‍රතිකාර කළත් නිට්ටාවට සුව වන්නේ ද නැත.
මේ නිසා නිවසේ ගෘහ මූලිකයා දැඩි මානසික තත්ත්වයෙන් පසුවන මොහොතක ඔහුට හමුවූ හිතවතකුගෙන් යම් සහනයක් ලැබුණි. ඒ සක් සුදක් සේ සාස්තර කියන දේවාලයකින් මෙම කරදරවලට විසඳුමක් ලැබෙන බවට හමුවූ හිතවතා පැවැසීම නිසාය.
නියමිත කෙම්මුුර දිනයක අවැසි පලතුරු වට්ටියක් ද රැගෙන නිවෙස ගැන බලන්නට නිවෙස් හිමියා දේවාලය කරා ගියේය.
පෝලිමේ රැඳී සිට තම වාරය පැමිණි පසු බුලත් අත හා පලතුරු වට්ටිය සමගින් පඬුරු ආදිය තබා ඔහු සාස්තරය අසන්නට විය.
නිවෙසට මිය ගිය කෙනකුගේ බැල්මක් නිසා නිවැසියන් වරින් වර රෝගා බාධවලට ලක්වන බවත් මේ නිසා දුකසේ උපයන සියල්ල නිකරුණේ විනාශ වන බවත් දෙවොලේ දෙවියා පැවසුවේය.
ප්‍රේත ආත්මය නිවෙසේ සිටින තරුණ වියේ පසුවන පුතාට ආරූඪ වී සිටින බවටද හෙළි කළේය.
එය ඉවත් කිරීමට අවැසි සාත්තුවක් නිවසේ සූදානම් කළ යුතු බවට උපදෙස් ලැබුණේය. මේ ගැන විශ්වාසයක් තැබූ නිවෙස් හිමියා කඩිනමින් එය ඉවත් කර ගැනීමට අවශ්‍ය සාත්තුව සිදු කිරීමට කටයුතු කළේය.
ඒ අනුව දෙවොලේ කණ්ඩායම නිවෙසට නියමිත දින සවස් යාමේ පැමිණියේය. බළි තොවිල් මැද රාත්‍රී කාලයේ සාත්තුව සිදු කරන අතරවාරයේ නිවෙසේ රැඳී සිටි තරුණයා පලා ගියේ ගෙදෙර කන්දොස්කිරියාව ගැන දැඩි කෝපයෙනි.
ඔහු අල්ලාගෙන එන්නට පිරිස ගියත් ඔහු නිවෙසට නොපැමිණෙන බව වටහා ගත් කට්ටඩියා ආරූඪයෙන්ම ඔහු රැඳී සිටින ස්ථානය කරා ගියේය.
එතැනට ගොස් තරුණයා අල්ලාගෙන හිස මත දෙහි ගෙඩි තබා කන්නලව් කරමින් දෙහි කපන්නට සූදානම් වනවාත් සමගම ආරූඪව සිටි දෙවියාට තරුණයා වැරෙන් පහර දුන්නේය.
ඔහු අත වූ දෙහි කපන්නට තිබූ ගිරය විසි වී ගොස් ඈතට වැටුණි.
පහර කෑමට ලක්වූ කට්ටඩියාට ද අමාරුය.
තරුණයා යළි එතැනින්ද පලාගියේ නිදා ගැනීමට තැනක් සොයමිනි. ආරූඪව සිටි කට්ටඩියා දැඩි අපහසුතා හමුවේ පසුවේ.
සාත්තුව හා කන්නලව්ව පසෙක තබා රැස්ව සිටි පිරිස කට්ටඩියා වහා රෝහල් ගත කළේය.
දින කිහිපයක් රෝහලේ නේවාසිකව ප්‍රතිකාර ගත් ඔහු ඉන් නික්ම ගොස් ඇතත් අතුරුදන්වූ ගිරය තවමත් සොයා ගන්නත් නැතිලු.
