(කරන්දෙණිය එම්. සුසිල් ප්‍රියන්ත)
රට වසා දැමීම හේතුවෙන් වෙළෙඳසලෙන් ඇණවුම් කරන ලද භාණ්ඩවලින් වෙළෙඳසල් හිමියා ගසාකන අයුරු නිවැසියකුගේ අතට හසුව වෙළෙඳසල් හිමියාගේ රෙදි ගැලවී ගිය අපූරු කතාවක් දකුණු පළාතෙන් වාර්තා වේ.
රට වැසීම නිසා නගරයේ වෙළෙඳසල්වලින් පාරිභෝගික භාණ්ඩ මිලදී ගැනීම ද ජනතාවට අහිමි විය. ඒ වෙනුවට තමන් ඇණවුම් කරන භාණ්ඩ වෙළෙඳසල්වලින් ලබාදීමේ සේවාවක් ද ක්‍රියාත්මක කෙරිණ. මේ වෙළෙඳසල ද එයට අනුගත විය. ජනතාව ඇණවුම් කරන භාණ්ඩ නිවෙසට යැවුණේ වෙළෙඳසලේ සහායකයකු අතේය. ඒ, ත්‍රිරෝද රථයකිනි. ඒ සඳහා ද ගාස්තුවක් අය කෙරිණි.
මේ නිවෙස් හිමියා ද රට වැසීමට පෙර නිවෙසට අවශ්‍ය බඩු ගැනීමට නොහැකි වූ නිසාම මේ වෙළෙඳසලෙන් භාණ්ඩ ඇණවුම් කළෙය්. ඒ අනුව භාණ්ඩ ටික වෙළෙඳසලෙන් ඔහුගේ නිවෙසට රැගෙන ආවේ එම වෙළෙඳසලේ සහායකයා විසිනි. ත්‍රිරෝද රථයෙන් රැගෙන ආ බඩු ටික නිවෙසට දමා ඒ සඳහා වූ බිලෙහි මුදල් ද රැගෙන යාමට වෙළෙඳ සහායකයා ඉක්මන් වූයේ තව නිවෙසකට බඩු දැමීමට ඇති බව කියමිනි.
‘ටිකක් ඉන්න’ යයි පැවැසූ නිවෙස් හිමියා බඩු ලැයිස්තුවේ බඩු එකින් එක පරීක්ෂා කළේ යාබද නිවෙසකින් ඉල්ලාගත් ඉලෙක්ට්‍රොනික තරාදියකින් වෙළෙඳසලෙන් කිරා එවන ලද භාණ්ඩ නැවතත් කිරා බලමිනි. ඔහුට එහිදී දැකගන්නට හැකි වූයේ කිරා එවන ලද හැම භාණ්ඩයකම නියම බර නැති බවය. ඒ හැම බඩුවකම බර අඩු බවය. මිල අධික සීනි, පරිප්පු වැනි ද්‍රව්‍යයන්වලින් ග්‍රෑම් දෙසීය තුන්සියය අඩු බව නිවෙස් හිමියාට දකින්නට ලැබිණ.
ඔහු මෙලෙස ඇණවුම් කරන ලද භාණ්ඩවල බර කිරීමට පෙළඹුණේ මීට පෙර ද රට වසා තිබියදී මේ වෙළෙඳසලෙන් එවන ලද බඩුවල නියම බර නැතැයි කියමින් බිරිය එදා නාහෙන් ඇඬීම මතක් වූ හෙයිනි. එදා බිරියගේ නාහෙන් ඇඬීම හරි යැයි සිතුණේ මෙවර එවූ බඩු හොරට කිරා ඇති බව දැනගැනීමත් සමගමය.
ඔහු මේ වෙළෙඳසලෙන් තමන්ට එවූ භාණ්ඩවල නියම බර නැතැයි කියමින් මුදලාලිට දෙස්දෙවොල් දුන්නේ කොරෝනා ව්‍යසනයෙන් අවතැන් වූ අය සූරා කෑමෙන් නිරයේ යන බව ද පවසමිනි. ඒ සමගම කලබල වූ මුදලාලි, “අනේ කලබල වෙන්න එපා, මට බඩු ගෙන ආ ත්‍රිරෝද රථයේ ගාස්තුවත් එපා... අඩු බඩුවල විස්තරය ගෝලයා අතේ එවන්න. මම ඒක දෙන්නම්... මේක කාටවත් කියන්න එපා... ඔය ගෝලයාගේ වැඩ තමයි...” කීවේය.
“මුදලාලි කියනවා මේ ඔයා තමයි බඩු හොරට කිරා තියෙන්නේ කියලා” යයි ඔහු ගෝලයාට කී විට අන්දුන්කුන්දුන් වූ ගෝලයා කීවේ, ඇණවුම් කරන ලද කිසිම කිරන භාණ්ඩයක් දැමීමට තමන්ට ඉඩ නොදෙන බවත් ඒවා දමනුයේ මුදලාලි බවත්ය.
