මොරගොල්ලාගම සිසිර කැලේගම
අලුත ගෙනා ලේලිය සැකසූ කෑම වේල දැක නැන්දම්මාට යක්ෂයා ආරූඪ වූ පුවතක් පන්සියගම පොලිස් වසමෙන් වාර්තාවේ.
මව නිවසේ පසුවූවාය. පුතා කොළඹ ප්‍රදේශයේ වැදගත් රැකියාවක නියැළී සිටියේය. මව කල දවස ගත වූ පුතාට සහකාරියක් සෙව්වාය.
සොයනා කාන්තාව ඉගෙන ගත් රූමත් තැනැත්තියක විය යුතු බවත් රැකියාවක් නොකළ යුතු බවත් මව නිතර කීවාය. තමා කසාද බඳින ගැහැනිය මවට පණමෙන් සලකන යහපත් ගෘහණියක් විය යුතු බවද පුතා නිතර සිතුවේය.
එලෙස සෙවූ කාන්තාවක ඔහුට හමුවුණි. ඇය කැඳවාගෙන නිවෙසට ආවේය. සැමියා ඇය නිවසේ නවතා සේවයට ගියේය. නැන්දම්මා ද දිනක උදේ වෙනත් කටයුත්තක් සඳහා නිවෙසින් නික්ම ගිය පසුව ලේලිය පමණක් නිවසේ තනි වූවාය. ඇය දහවල් ආහාර වේල සැකසීමට සූදානම් වූවාය.
ඇය බත් උයා වෑංජනද සකසා නැන්දම්මාගේ ප්‍රියතම කෑමක් වූ සම්බෝලයක් ද පිළියෙළ කළේ නැන්දම්මාගේ හිත දිනා ගැනීමටය. ඔය අතර වාරයේ නැන්දම්මාද ගෙට ගොඩ වූවාය. අලුත ගෙනා ලේලිය සැකසූ කෑම වේල දැක ඇය පුදුමාකාර සතුටකට පත්වූවාය. කෑම ගැනීමට මුලුතැන්ගෙට ගිය ඇය කෑම බෙදා ගැනීමට සැරසුණාය.
දුවේ මේ සම්බෝලය හැදූ භාජනය මොකක්ද? ඒක බල්ලන්ට කෑම දීම සඳහා වෙන්කර තිබෙන බඳුනකි. ලේලිය කුස්සියේ ඉවත දමන දේ හා මිදුලේ තිබෙන බත් විසිකර දමා සියලු භාජන කුස්සියට ගෙනැවිත් තැබීමෙන් මෙම අකරතැබ්බය සිදුවී තිබෙන බව ඇය වටහා ගත්තාය.
අවසානයේ නැන්දම්මාගේ ප්‍රියතම කෑමට සැකසූ සම්බෝලය පමණක් නොව අනිකුත් කෑම ටිකත් එළියට විසිකර දැම්මාය. අහේනිය හමුවේ කෑම වේලක් ඉවත දැමීම ගැන නැන්දම්මාගෙන් එල්ලවූ නින්දා අපහාස අසන්නට අහළ පහළ නිවැසියෝද පැමිණියහ.
අවසානයේ සමාජයට මුහුණ දීමට නොහැකිවූ ලේලිය කාමරයට වී දැඩි අපහසුතා හමුවේ පසුවෙනවාලු.
