මාවතගම කාන්චන මාලා බණ්ඩාර
අන්තර් ජාලයේ සැරි සැරූ ඇයට මිතුරකු මුණ ගැසිණි. ඒ ඉන්දියානු ජාතිකයෙකි.
ඇය කුරුණෑගල ප්‍රදේශයේ පදිංචිකාරියකි. රජයේ රැකියාවක් කළ 38 හැවිරිදි ඈ තරමක රූමතියකි. ඇගේ විවාහය දිනෙන් දින කල්ගත වීමට හේතු වූයේ හැමවිටම කඩවසම් සැමියකු සෙවූ නිසාමය.
අන්තර්ජාලයෙන් හමු වූ මිතුරා ඇය සමග තොරතුරු හුවමාරු කර ගත්තේය. වැඩිකල් නොගොස්ම ඇය ඔහුගේ පෙම්වතිය බවට පත් වූවාය. තමා ඉන්දියාවේ ව්‍යාපාර රැසක හිමිකරුවකු බව පැවසීමෙන් ඇගේ සිතට මහත් සැනසිල්ලක් ලැබුණි.
රට පෙම්වතා ඇය ඉක්මනින් විවාහ කර ගන්නා බව පැවසූ නිසා ඇයට තම මවුපියන්ගේ ද කැමැත්ත ලැබුණි. ඒ සඳහා දින ද නියම කෙරිණි. ඔහු ඇය වෙනුවෙන් මිලදී ගත් රන් ආභරණ ද ඔහු වීඩියෝ තාක්ෂණය ඔස්සේ ඇයට පෙන්වනු ලැබිණි.
ඔහු පැවසුවේ විවාහයට පෙරදින තමා ශ්‍රී ලංකාවට පැමිණෙන බවය. එබැවින් විවාහයට අවශ්‍ය සියලු කටයුතු සූදානම් කරන ලෙස ද ඔහු දැන්වීය. දින ගෙවී ගියෙන් විවාහ දිනය එළඹිණි. අලුයම එන ගුවන් යානයේ තමා ඒම සඳහා පිටත් වූ බව ඔහු දැනුම් දුන්නේ ඇයට සතුට ද එක් කරමිණි.
තම අනාගත සැමියා කලින් කතා කරගත් පරිදි ගුවන් තොටුපළ වෙත එන නිසා ඔහු පිළිගැනීමට නෑදෑ පිරිසක් යැවීමට ඈ අමතක නොකළාය.
විවාහ නැකතට තව ඇත්තේ පැය කීපයකි. හදිසියේ ඇගේ දුරකථනය නාද විය. ඇගේ සතුට නිමක් නැත. ඒ ඔහුගේ හඬය. ‘‘මම ඔයාට ගෙනාව රන් බඩුවල වටිනාකම වැඩි නිසා ඉන්දියානු පොලිසිය මාව අත්අඩංගුවට ගත්තා. ඒව ගැන මට දුකයි. ඒ ටික නිදහස් කරන්න ලක්ෂ දහ අටක් ඕනෑ. පුළුවන්නම් මගේ ගිණුමට දැන්ම දාන්න.’’ ඈ හඬා වැළපුණාය.
අවසානයේ ඔහුගේ ගිණුමට මුදල් බැර කළේ මවුපියන් ඈ වෙනුවෙන් වසර ගණනාවක් ඉතිරි කළ මුදල් වලිනි.
පසුව ඇය ඔහු ඇමතීමට ගත් උත්සාහයන් සියල්ල නිෂ්ඵල විය. එතැන් සිට ඔහුගේ දුරකථනය ද නිහඬය. හඬා වැළපෙමින් ඇය පොලිසියේ සහාය පැතුව ද ඇය රැවටු මෙම ජාත්‍යන්තර වංචාකාරයා සෙවීම ලෙහෙසි පහසු කාර්යයක් නොවීය.
