(අජිත්ලාල් ශාන්තඋදය)

අධික වර්ෂාව හේතුවෙන් රත්නපුර සිට වේවැල්වත්ත දක්වා යන විකල්ප මාර්ගයේ ගලබඩ දෙමළ විද්‍යාලය අසල කන්දක් බදාදා (13) රාත‍්‍රීයේ කඩා වැටීමෙන් එම මාර්ගයේ මීටර් 30ක පමණ කොටසක් පස්වලින් යටවී ගමනාගමනය ඇණහිට ඇතැයි ජාතික ගොඩනැගිලි හා පර්යේෂණ සංවිධානය කියයි.

මෙම මාර්ග අවහිරවීම නිසා ගලබඩ, හපුගස්තැන්න සහ වේවැල්වත්ත ‍තේ කම්හල්වලට අමු තේ දළු ප‍්‍රවාහන කටයුතුවලටද දැඩි බාධා එල්ලවි තිබේ.

පවතින කාලගුණ තත්ත්වය නිසා නායයාමට ලක්ව ඇති ආඳැල්ල ප‍්‍රදේශයේ පස් ඉවත් කිරීම අනතුරුදායක බව ජාතික ගොඩනැගිලි හා පර්යේෂණ සංවිධානයේ රත්නපුර දිස්ත‍්‍රික් ඉංජිනේරු අභීත වනසුන්දර මහතා පෙන්වා දෙයි.

වේවැල්වත්ත මාර්ගයේ විකල්ප මාර්ග ද නායයාමට ලක්ව ඇති නිසා රත්ගඟට යාම සඳහා දුරෙක්කන්ද වනුමුරේ හරහා ගල්කඳුර මාර්ගය භාවිතා කළ හැකි බව පොලීසිය කියයි. මෙම මාර්ග ග‍්‍රාමීය මාර්ග නිසා පහසුකම් අවම බවත් වාහන තදබද ඇතිවිය හැකි බැවින් ප‍්‍රවේසමෙන් රිය පදවන ලෙසත් පොලීසිය මහ ජනතාවට දැනුම් දෙයි.