(රවින්ද්‍ර විරාජ් අබයසිරි )
 
මාතලේ මහ නගර සභාවේ විපක්ෂයේ මන්ත්‍රීව පිරිසක් අද(20) මාතලේ අඹගහමුල බස් නැවතුම්පළ ඉදිරිපිට විරෝධතාවක නිරතවූහ.
 
මාතලේ මහ නගරාධිපති ඩල්ජිත් අලුවිහාරේ මහතා විසින් මධ්‍යම පළාත් ආණ්ඩුකර මෛත්‍රී ගුණරත්න මහතා නොමග යවා සක්‍යතා වාර්තාව පවා  අනුමත නොවුණු ප්‍රාදේශීය ලේකම් කාර්යාලය සතු ඉඩමක නව ගොඩනැගිල්ල ඉදිකිරීම සඳහා මුල්ගල තැබීමට විරෝධය දක්වමින් ඔවුහු උද්ඝෝෂණයේ නියැලුණහ.
 
නාගරික මන්ත්‍රි අමිල නිරෝශන මහතා මෙසේ පැවසීය.
 
“මෙම ඉඩම මාතලේ මහ නගර සභාවට අයත් නොවන ඉඩමක්.  බස් නැවතුම්පළ සංවර්ධනය කරන මුවාවෙන් බස්නැවැතුම්පළ මැදින් අඩි 12ක මාර්ගයක් ඉදිකරදීමට එක් ව්‍යපාරිකයෙකුගෙන් රුපියල් ලක්ෂ 20ක මුදලක් ලබාගෙන ඇති බවට අපිට තෙරතුරු ලැබිලා තිබෙනවා. අපි පසුගිය සභාවේදී මෙම ක්‍රියාවට අනුමැතිය ලබා දුන්නේ නෑ. නගරාධිපති ඔහුගේ තනිමතයට මෙම කටයුත්ත කර තිබෙන්නේ. ආණ්ඩුකාරවරයාවත් නොමග යවලා. ඊයේ උත්සවයට නගර සභාවේ මුදල් රුපියල් ලක්ෂ දෙකක් වැය කර තිබෙනවා. එය මුදල් අවභාවිතා කිරීමක්. අපි ඒ පිළිබඳව පියවර ගන්නවා. මෙම නීති විරෝධි ක්‍රියාවට අපි විරුද්ධයි” යැයි ද හෙතෙම පැවසීය.
 
විරෝධතාව සඳහා පොදු පෙරමුණු නාගරික මන්ත්‍රීවරුන් වන අමිල නිරෝශන, සරත් ජයතුංග, දිනේෂ් විරසිංහ, ජනතා විමුක්ති පෙරමුණු මන්ත්‍රී එම්. නිලාෆ් යන මහත්වරු සහ මගී අයිතින් සුරකීමේ සංවිධානය සහභාගී වූහ.